കൊളത്തൂര്‍: കൊളത്തൂര്‍ തെക്കേക്കര പ്രദേശത്ത് ചിക്കന്‍പോക്‌സ് വ്യാപിക്കുന്നത് സമീപവാസികളെ ആശങ്കയിലാഴ്ത്തുന്നു. രണ്ടാഴ്ചയോളമായി പ്രദേശത്ത് 15ലേറെ പേര്‍ അസുഖബാധിതരായിട്ടുണ്ട്. കുഞ്ഞുങ്ങളില്‍ അസുഖം പിടിപെടുന്നതോടെ വീട്ടിലെ മറ്റെല്ലാ അംഗങ്ങളിലേക്കും പകര്‍ച്ചവ്യാധി പരക്കുന്നു. ഇതോടെ വീടടക്കി എല്ലാ അംഗങ്ങളും പകര്‍ച്ചവ്യാധിയില്‍ അകപ്പെടുന്നു.
ശരീരത്തില്‍ ചുമന്ന കുമിളകള്‍ പൊന്തുന്നതോടെ കിടന്നുറങ്ങാന്‍ പോലും പ്രയാസകരമാണെന്നാണ് അസുഖബാധിതര്‍ പറയുന്നത്. വീട്ടിലെ ഗൃഹനാഥനടക്കമുള്ളവര്‍ അസുഖ ബാധിതനാകുന്നതോടെ വീട്ടില്‍ നിന്ന് പുറത്തിറങ്ങുവാനോ ആശുപത്രിയില്‍ മറ്റു വാഹനങ്ങളില്‍ യാത്ര ചെയ്യുവാനോ പ്രയാസകരമാണ്. ദിനംപ്രതി പകര്‍ച്ചവ്യാധിയായ ചൊള്ളരോഗം പടര്‍ന്നുകൊണ്ടേയിരിക്കുകയാണ്. മറ്റുള്ളവരിലേക്ക് പകര്‍ച്ചവ്യാധി പടരും മുമ്പേ അധികൃതരുടെ പ്രതിരോധ പ്രവര്‍ത്തനങ്ങള്‍ കര്‍ശനമാക്കിയില്ലെങ്കില്‍ ജനവാസ കേന്ദ്രം പകര്‍ച്ചവ്യാധി കേന്ദ്രമായി മാറുമെന്നാണ് അസുഖബാധിതര്‍ പറയുന്നത്.