നിലമ്പൂര്‍: ഷൊര്‍ണൂര്‍-നിലമ്പൂര്‍ റെയില്‍പാതയില്‍ മൂന്നു മേല്‍പാലങ്ങള്‍ക്ക് അനുമതി ലഭിച്ചു. നിലമ്പൂര്‍, ചെറുകര, പട്ടിക്കാട് എന്നിവിടങ്ങളിലാണ് മേല്‍പാലങ്ങള്‍ സ്ഥാപിക്കുക. കഴിഞ്ഞ ദിവസം ദക്ഷിണ റെയില്‍വേ ഡെപ്യൂട്ടി റീജ്യണല്‍ മാനേജര്‍ നരേഷ് ലല്‍വാനി, സീനിയര്‍ ഡി.സി.എം കെ.പി ദാമോദരന്‍, അഡീഷണല്‍ ഡി.ആര്‍.എം രാജ്കുമാര്‍, ഡോ. ബിജു നൈനാന്‍ തുടങ്ങിയവരുടെ നേതൃത്വത്തില്‍ പാലക്കാട്ടു ചേര്‍ന്ന റെയില്‍വേ ഉപദേശക സമിതി യോഗത്തിലാണ് തീരുമാനം.
മേല്‍പാലങ്ങള്‍ക്കുള്ള തുകയുടെ പകുതി സംസ്ഥാന സര്‍ക്കാര്‍ നല്‍കണം. നിലമ്പൂര്‍-ഷൊര്‍ണൂര്‍ പാതയെ ഹരിത ഇടനാഴിയാക്കുന്നതിന്റെ ഭാഗമായി എല്ലാ ട്രെയിനുകളിലും ബയോ ശുചിമുറികളായിരിക്കും നിര്‍മിക്കുക. വിനോദ സഞ്ചാരികളെ ലക്ഷ്യമിട്ടു പ്രകൃതിഭംഗി ആസ്വദിക്കുന്ന തരത്തില്‍ പ്രത്യേക കോച്ച്, നിലമ്പൂര്‍-തിരുവനന്തപുരം രാജ്യറാണി എക്‌സ്പ്രസ് സ്വതന്ത്ര ട്രെയിനാക്കുന്നത്, നിലമ്പൂര്‍-ഷൊര്‍ണൂര്‍ പാസഞ്ചര്‍ പാലക്കാടുവരെ നീട്ടുന്നത് എന്നിവ റെയില്‍വേയുടെ പരിഗണനയിലാണ്.
പി.വി അബ്ദുല്‍ വഹാബ് എം.പിയുടെ ഇടപെടലില്‍ റെയില്‍വേയുടെ വികസന പ്രവര്‍ത്തനങ്ങള്‍ ത്വരിതഗതിയില്‍ നടന്നുവരികയാണെന്നും ഡി.ആര്‍.എം അറിയിച്ചു. എം.പിയുടെ ഫണ്ടില്‍ നിര്‍മിച്ച പ്രവൃത്തികളുടെ ഉദ്ഘാടനം ഉടന്‍ നടത്താനും യോഗത്തില്‍ തീരുമാനമായി.