പാലാ: യു.ഡി.എഫ് സ്ഥാനാര്‍ഥി തോമസ് ചാഴികാടന്റെ മീനച്ചില്‍, എലിക്കുളം, കൊഴുവനാല്‍, രാമപുരം, തലപ്പലം, എന്നീ പഞ്ചായത്തിലെ പ്രചരണപരിപാടികള്‍ പാലാ സെന്റ്‌തോമസ് കത്തീഡ്രലിലെ കെ.എം മാണിയുടെ ശവകുടീരത്തില്‍ നിന്നും ആരംഭിച്ചു. കോട്ടയം ലോക്‌സഭാ യു.ഡി.എഫ് സ്ഥാനാര്‍ഥി തോമസ് ചാഴികാടന്‍ കെ.എം മാണിയുടെ ശവകുടീരത്തില്‍ പുഷ്പാര്‍ച്ചന നടത്തി പ്രാര്‍ഥിച്ചു.
ജോസ് കെ. മാണി എം.പി ശവകുടീരത്തില്‍ നിന്ന് പകര്‍ന്നു നല്‍കിയ തിരിനാളം ഛായ ചിത്രം സ്ഥാപിച്ചിരിക്കുന്ന വാഹനത്തിലെ വിളക്കില്‍ തെളിച്ചു. കെ.എം മാണിയുടെ ഛായചിത്രം വഹിച്ചുകൊണ്ടുള്ള സ്മൃതിയാത്രയില്‍ വിവിധ സ്ഥലങ്ങളില്‍ കാത്തുനിന്നിരുന്ന യു.ഡി.എഫ് പ്രവര്‍ത്തകര്‍ കെ.എം മാണിയുടെ ചിത്രത്തില്‍ പുഷ്പാര്‍ച്ചന നടത്തി. ആഘോഷപരിപാടികള്‍ ഒഴിവാക്കിയാണ് തോമസ് ചാഴികാടന്‍ പര്യടനം പൂര്‍ത്തിയാക്കിയത്.