പെരുമ്പാവൂര്‍: തടി ലോറി തടഞ്ഞ് നിര്‍ത്തി ഡ്രൈവറേയും ക്ലീനറേയും മര്‍ദിച്ച് വാഹനം തല്ലിതകര്‍ത്തതായി പരാതി. ഞായറാഴ്ച്ച പുലര്‍ച്ചെ 5.30ന് മാറംമ്പിള്ളി കുന്നുവഴിയില്‍ വച്ചാണ് സംഭവം.
കന്യാകുമാരി സ്വദേശികളായി ലോറി ഡ്രൈവര്‍ അമ്പലവിള വീട്ടില്‍ സുരേഷ് (38), ക്ലീനര്‍ മരുകന്‍ എന്നിവര്‍ക്ക് സംഭവത്തില്‍ പരുക്കേറ്റ് ആശുപത്രിയില്‍ ചികിത്സയിലാണ്. വല്ലത്ത് പ്രവര്‍ത്തിക്കുന്ന സുബൈദ പ്ലൈവുഡിലേക്ക് തടിയുമായി വന്ന ലോറിയാണ് സിഫ്റ്റ് കാറില്‍ മുഖം മൂടി ധരിച്ചെത്തിയ സംഘം തന്നേയും ക്ലീനറേയും മര്‍ദിച്ച് വാഹനം തല്ലിതകര്‍ത്തതെന്ന് ഡൈവ്രര്‍ സുരേഷ് പൊലിസില്‍ നല്‍കിയ പരാതിയില്‍ പറയുന്നു.
പെരുമ്പാവൂരിലെ തടി വ്യവസായികള്‍ക്കിടയിലെ അസ്വാരസ്യങ്ങളാണ് പ്രശ്‌നത്തിന് കാരണമെന്നാണ് സൂചന.
 ചില പ്ലൈവുഡ് കമ്പനികള്‍ക്ക് സമീപകാലത്ത് ഉപരോധം ഏര്‍പ്പെടുത്തിയതിനെതിരെ കോടതിയെ സമീപിക്കുകയും ഈ പ്ലൈവുഡ് കമ്പനികള്‍ അനുകൂല വിധി സമ്പാദിക്കുകയും ചെയ്തിരുന്നു. ഈ പ്രശ്‌നങ്ങളാകാം അടിപിടിയില്‍ കലാശിച്ചതെന്ന് പൊലിസ് പറഞ്ഞു. പെരുമ്പാവൂര്‍ പൊലിസ് കേസെടുത്ത് അന്വേഷണം ആരംഭിച്ചു.