സ്വന്തം ലേഖകന്‍
തിരുവനന്തപുരം: കൊവിഡ് രോഗികളുടെ വിവര ശേഖരണത്തിലും, കണ്ടെയ്ന്‍മെന്റ് സോണ്‍ നിശ്ചയിക്കുന്നതിലും വകുപ്പുകള്‍ക്കിടയില്‍ ആശയക്കുഴപ്പം. റവന്യൂ വകുപ്പും പൊലിസുമാണ് ആശയക്കുഴപ്പം സൃഷ്ടിച്ചിരിക്കുന്നത്. കൊവിഡ് പ്രതിരോധ പ്രവര്‍ത്തനങ്ങള്‍ പൂര്‍ണമായി പൊലിസിനെ ഏല്‍പ്പിച്ചതിനു പിന്നാലെ ശക്തമായ എതിര്‍പ്പുമായി ജില്ലാ കലക്ടര്‍മാര്‍ രംഗത്ത് വന്നിരുന്നു. ഇതിനു പിന്നാലെ വിവരശേഖരണത്തിലും കണ്ടെയ്ന്‍മെന്റ് സോണുകള്‍ നിശ്ചയിക്കുന്നതിലും പൂര്‍ണാധികാരം ജില്ലാ ദുരന്ത നിവാരണ അതോറിറ്റിക്ക് നല്‍കി റവന്യൂ പ്രിന്‍സിപ്പല്‍ സെക്രട്ടറി എ.ജയതിലക് കഴിഞ്ഞ ദിവസം ഉത്തരവിറക്കി. കണ്ടെയ്ന്‍മെന്റ് സോണുകളുടെ പരിപാലനം മാത്രമാണ് പൊലിസിന്റെ ചുമതലയെന്നും നിയന്ത്രണങ്ങള്‍ ഏര്‍പ്പെടുത്തും മുന്‍പ് പ്രദേശത്തെ ജനങ്ങളെ അറിയിക്കണമെന്നും ഉത്തരവിലുണ്ട്. എന്നാല്‍ സമ്പര്‍ക്ക പട്ടിക തയാറാക്കുന്നതടക്കം പൊലിസ് നേതൃത്വം നല്‍കണമെന്ന് കാണിച്ച് നേരത്തെ ചീഫ് സെക്രട്ടറി ഉത്തരവിറക്കിയിരുന്നു. ഈ ഉത്തരവ് നിലനില്‍ക്കേയാണ് റവന്യൂ സെക്രട്ടറി കഴിഞ്ഞ ദിവസം ഉത്തരവിറക്കിയത്.
അതേസമയം, കൊവിഡ് പ്രതിരോധത്തില്‍ റവന്യൂ സെക്രട്ടറിയുടെ ഉത്തരവ് മറികടന്ന് മുന്നോട്ടു പോകാനാണ് പൊലിസിന്റെ തീരുമാനം. രോഗികളുടെ ഫോണ്‍ വിവരശേഖരണം തുടരും. ക്രമീകരണങ്ങള്‍ വൈകരുതെന്ന് അറിയിച്ച് ടെലികോം സേവനദാതാക്കള്‍ക്ക് പൊലിസ് കത്ത് നല്‍കി. ടവര്‍ പ്രദേശവും സംസാരിച്ച നമ്പരുകളും ഒപ്പം വേണമെന്നും കത്തില്‍ പറയുന്നു.