കൊട്ടാരക്കര: മദ്യലഹരിയില്‍ ഭാര്യയെ മണ്ണെണ്ണ ഒഴിച്ച് തീ കൊളുത്തി കൊലപ്പെടുത്തിയ സംഭവത്തില്‍ ഭര്‍ത്താവ് പിടിയില്‍. കോട്ടത്തല മൂഴിക്കോട് ചരുവിള വീട്ടില്‍ മായ (42) മരിച്ച കേസിലാണ് ഭര്‍ത്താവ് രാജനെ (52) പൊലിസ് പിടികൂടിയത്.

ബുധനാഴ്ച രാത്രി 7.30ഓടെ ആയിരുന്നു സംഭവം. മദ്യപിച്ചെത്തിയ രാജന്‍ ഭാര്യയുമായി വഴക്കിട്ടശേഷം അവരുടെ ദേഹത്ത് മണ്ണെണ്ണ ഒഴിച്ച് തീ കൊളുത്തുകയായിരുന്നു. തുടര്‍ന്ന് മകളും അയല്‍വാസികളും ചേര്‍ന്ന് തീ അണച്ച് മായയെ കൊട്ടാരക്കര താലൂക്ക് ആശുപത്രിയില്‍ എത്തിച്ചു.
ശരീരത്തില്‍ 90 ശതമാനവും പൊള്ളലേറ്റതിനാല്‍ തിരുവനന്തപുരം മെഡിക്കല്‍ കോളജ് ആശുപത്രിയിലേക്കു മാറ്റിയെങ്കിലും വ്യാഴാഴ്ച വൈകിട്ടോടെ മരിക്കുകയായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. മക്കള്‍: മീരാ രാജ്, രാഹുല്‍.