റിയാദ്: കഴിഞ്ഞ വര്‍ഷം മദീനയിലെ പ്രവാചക പള്ളിയില്‍ നടന്ന ചാവേര്‍ ആക്രമണത്തിലെ പ്രതികളെയടക്കം രാജ്യത്ത് വിവിധ സ്ഥലങ്ങളില്‍ ചാവേര്‍ ആക്രമണങ്ങളും മറ്റു ഭീകരാക്രമണങ്ങളും ആസൂത്രണം ചെയ്യുകയും അതിനുള്ള ആയുധങ്ങളും മറ്റും തയാറാക്കുകയും ചെയ്യുന്ന വന്‍ സംഘത്തെ പിടികൂടിയതായി സഊദി ആഭ്യന്തര മന്ത്രാലയം വ്യക്തമാക്കി.

തീവ്രവാദ സെല്ലിലെ 46 പേരെ പിടികൂടിയതായും വന്‍ തോതില്‍ ആയുധങ്ങളും മറ്റും പിടിച്ചെടുത്തതായും ആഭ്യന്തര മന്ത്രാലയ വക്താവ് മേജര്‍ ജനറല്‍ മന്‍സൂര്‍ അല്‍ തുര്‍ക്കിയെ ഉദ്ധരിഹ് സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു.
പിടിയിലായവരില്‍ ഏറിയ പങ്കും സഊദി പൗരന്മാരാണ്. 32 സ്വദേശി പൗരന്മാരാണ് പിടിയിലായത്. ബാക്കിയുള്ള പതിനാലു പേര്‍ പാകിസ്ഥാന്‍, യമന്‍, അഫ്ഗാനിസ്ഥാന്‍, ഈജിപ്ത് , ജോര്‍ദ്ദാന്‍, സുഡാന്‍ എന്നിവിടങ്ങളില്‍ നിന്നുള്ളവരാണ്.

വിശദ വിവരങ്ങള്‍ ഉടന്‍ പുറത്തു വിടുമെന്ന് മന്ത്രാലയം വ്യക്തമാക്കി. പിടിയിലായവര്‍ ഐ.എസ് തീവ്രവാദ സംഘങ്ങളില്‍പെട്ടവരാണ്.

കഴിഞ്ഞ വര്‍ഷം പ്രവാചക പള്ളിക്കു സമീപമുണ്ടായ ചാവേര്‍ ആക്രമണത്തില്‍ നാലു സുരക്ഷാ ഉദ്യോഗസ്ഥര്‍ കൊല്ലപ്പെടുകയും അഞ്ചു പേര്‍ക്ക് പരുക്കേല്‍ക്കുകയും ചെയ്തിരുന്നു. ആക്രമണത്തിന്റെ ഉത്തരവാദിത്വം ഐ.എസ് ഏറ്റെടുക്കുകയും ചെയ്തിരുന്നു. ഇതേ കാലയളവില്‍ തന്നെ കിഴക്കന്‍ പ്രവിശ്യയിലെ ഖതീഫ്, ജിദ്ദയിലെ അമേരിക്കന്‍ എംബസി എന്നിവിടങ്ങളിലും ആക്രമണം നടന്നിരുന്നു.