ന്യൂഡല്‍ഹി: ടിക് ടോക് ഇന്ത്യയില്‍ നിരോധിച്ചിട്ട് നാലുദിവസം പിന്നിട്ടപ്പോള്‍ മറ്റ് സൈറ്റുകളില്‍നിന്ന് ആപ്പ് ഡൗണ്‍ലോഡ് ചെയ്യുന്നത് 12 ഇരട്ടിയോളം വര്‍ധിച്ചതായി റിപ്പോര്‍ട്ട്. നിരോധനം നിലവില്‍വന്നപ്പോള്‍ ഗൂഗിള്‍ പ്ലേസ്റ്റോര്‍, ആപ്പിള്‍ സ്റ്റോര്‍ എന്നിവയില്‍ നിന്ന് ടിക് ടോക് ആപ്പ് നീക്കിയിരുന്നു. എന്നാല്‍, ചൈനീസ് ആപ്പായ ടിക് ടോക്ക് തേഡ് പാര്‍ട്ടി വെബ് സൈറ്റുകളില്‍നിന്നാണ് ഇപ്പോള്‍ വ്യാപകമായി ഡൗണ്‍ലോഡ് ചെയ്യുന്നത്. ഡൗണ്‍ലോഡ് ചെയ്യുന്നവരില്‍ ഇന്ത്യക്കാരാണ് മുന്നിലെന്നാണ് കണ്ടെത്തിയിട്ടുള്ളത്. നിരോധനത്തിനുശേഷം ഗൂഗിള്‍ സെര്‍ച്ച് ട്രന്‍ഡിങില്‍ 'ടിക് ടോക് ഡൗണ്‍ലോഡ്' ഏറെ മുന്നിലെത്തിയിട്ടുണ്ട്.
2018ലെ കണക്കനുസരിച്ച് ടിക് ടോകിലെ 50 കോടി ഉപയോക്താക്കളില്‍ 39 ശതമാനവും ഇന്ത്യയില്‍നിന്നാണ്. ഇന്ത്യയില്‍ പ്രതിമാസം 12 കോടി സജീവ ഉപയോക്താക്കളുണ്ടെന്നും ടിക് ടോക് കോടതിയില്‍ വ്യക്തമാക്കിയിരുന്നു. സാംസ്‌കാരിക മ്യൂല്യങ്ങളെ തരംതാഴ്ത്തുന്നു, അശ്ലീലത പ്രചരിപ്പിക്കുന്നു, സാമൂഹിക പ്രശ്‌നങ്ങള്‍ക്ക് വഴിവെക്കുന്നു, കൗമാരക്കാര്‍ക്കിടയില്‍ ആരോഗ്യപ്രശ്‌നങ്ങള്‍ക്കിടയാക്കുന്നു തുടങ്ങിയ പരാതികളുടെ അടിസ്ഥാനത്തിലാണ് ടിക് ടോക് നിരോധിച്ചത്.