ന്യൂഡല്‍ഹി: പാക് അധീന കശ്മീരില്‍ 55 തീവ്രവാദി ക്യാംപുകള്‍ പ്രവര്‍ത്തിക്കുന്നുണ്ടെന്ന് സര്‍ക്കാര്‍. ഇവരെ നിയന്ത്രണ രേഖ കടത്തിവിട്ട് ജമ്മു കശ്മീരില്‍ സംഘര്‍ഷമുണ്ടാക്കാന്‍ നിയോഗിക്കുന്നുവെന്നും അവര്‍ പറഞ്ഞു. നേരത്തെ 35 തീവ്രവാദ കേന്ദ്രങ്ങളാണുണ്ടായിരുന്നത്. ഇക്കൊല്ലം മാത്രം 20 ക്യാംപുകള്‍ പുതുതായി തുടങ്ങി.

കഴിഞ്ഞവര്‍ഷം സെപ്തംബറില്‍ ഇന്ത്യന്‍ സേന നടത്തിയ സര്‍ജിക്കല്‍ സ്‌ട്രൈക്കിന്റെ സമയത്ത് 35 ക്യാംപുകളാണ് ഉണ്ടായിരുന്നത്. ചില കേന്ദ്രങ്ങളില്‍ ആക്രമണം നടന്നതോടെ പാക് അധീന കശ്മീരിന്റെ ഉള്‍വശങ്ങളിലേക്ക് നീങ്ങുകയും കൂടുതല്‍ കേന്ദ്രങ്ങള്‍ തുടങ്ങുകയും ചെയ്തു. ജനുവരി മുതലാണ് പുതിയ ക്യാംപുകള്‍ ആരംഭിച്ചത്.

2017 ആദ്യ നാലു മാസങ്ങളില്‍ മാത്രം 60 ലേറെ നുഴഞ്ഞുകയറ്റ ശ്രമങ്ങളാണ്ടായത്. ഇന്റലിജന്‍സ് റിപ്പോര്‍ട്ട് പ്രകാരം 160 തീവ്രവാദികള്‍ കശ്മീരില്‍ സജീവമായി പ്രവര്‍ത്തിക്കുന്നുണ്ടെന്നാണ് സര്‍ക്കാര്‍ വൃത്തങ്ങള്‍ പറയുന്നത്. പാകിസ്താനില്‍ നിന്നാണ് ഇവര്‍ക്ക് ആക്രമണം നടത്താനുള്ള നിര്‍ദേശം ലഭിക്കുന്നതെന്നും സര്‍ക്കാര്‍ വൃത്തങ്ങള്‍ പറയുന്നു.