ഏതന്‍സ്: ആയിരത്തിലേറെ അഭയാര്‍ഥികളെ രഹസ്യമായി നാടുകടത്തുകയും നിയമവിരുദ്ധമായി കടലില്‍ തള്ളുകയും ചെയ്ത് ഗ്രീസ്. കഴിഞ്ഞ ഏതാനും മാസങ്ങള്‍ക്കിടെയാണിത്. ന്യൂയോര്‍ക്ക് ടൈംസാണ് ഇക്കാര്യം റിപ്പോര്‍ട്ട് ചെയ്തത്.

ഈവര്‍ഷം മാര്‍ച്ച് മുതല്‍ പല സന്ദര്‍ഭങ്ങളിലായി 1,072 അഭയാര്‍ഥികളെ ഗ്രീസ് അധികൃതര്‍ കടലില്‍ ഉപേക്ഷിച്ചതായി തുര്‍ക്കി തീരദേശസേനയെയും ദൃക്‌സാക്ഷികളെയും ഉദ്ധരിച്ച് പത്രം റിപ്പോര്‍ട്ട് ചെയ്തു. സിറിയയ്ക്കും ഗ്രീസിനുമിടയിലെ കടലില്‍ യന്ത്രം ഘടിപ്പിക്കാത്ത കേടുപാടുള്ള ബോട്ടുകളിലാണ് ഇവരെ ഉപേക്ഷിച്ചത്. ഇതിലധികവും സിറിയന്‍ അഭയാര്‍ഥികളാണ്. ഇത്തരത്തില്‍ ഗ്രീസ് അഭയാര്‍ഥികളെ നിര്‍ദയം ഉപേക്ഷിച്ച 31 സംഭവങ്ങള്‍ ന്യൂയോര്‍ക്ക് ടൈംസ് കണ്ടെത്തി. രാജ്യത്തെ വലതുപക്ഷ സര്‍ക്കാര്‍ അഭയാര്‍ഥി കാര്യത്തില്‍ കടുത്ത നിലപാടാണ് സ്വീകരിക്കുന്നത്.