മൂന്നാര്‍: മന്ത്രി എം.എം.മണി രാജിവയ്ക്കണമെന്നാവശ്യപ്പെട്ടു പെമ്പിളൈ ഒരുമൈ നേതാക്കള്‍ നടത്തുന്ന റിലേ സത്യഗ്രഹം തുടരുന്നു. പെമ്പിളൈ ഒരുമൈ ജനറല്‍ സെക്രട്ടറി രാജേശ്വരിയാണ് ഇന്നലെ സത്യഗ്രഹം നടത്തിയത്. ആദിവാസി ഗോത്രസഭ നേതാവ് സി.കെ ജാനു ഇന്നലെ സമരപ്പന്തല്‍ സന്ദര്‍ശിച്ചു. സി.പി.എം ഭരിക്കുന്ന കേരള സംസ്ഥാനം മാടമ്പി രാഷ്ട്രീയത്തിന്റെ പിടിയമര്‍ത്തിരിക്കുന്നതിന്റെ തെളിവാണ് മന്തി എം.എം മണിയുടെ സ്ത്രീ വിരുദ്ധ പരമാര്‍ശങ്ങളെന്ന് സി.കെ ജാനു പറഞ്ഞു.
വേലി തന്നെ വിളവു തിന്നുന്ന അവസ്ഥയിലാണ് ഇപ്പോഴുള്ള സര്‍ക്കാര്‍. കേരള ചരിത്രത്തില്‍ ഇന്നു വരെ കാണാത്ത വിധത്തിലുള്ള ഏകാധിപത്യവും നീചവുമായ ഭരണമാണ് നടന്നു വരുന്നത്. മൂന്നാറിലെ കൈയേറ്റങ്ങള്‍ ഒഴിപ്പിച്ചു വരുന്ന ശ്രീറാം വെങ്കിട്ടരാമനെന്ന ഉദ്യോഗസ്ഥനെ അധിക്ഷേപിച്ചതു വഴി മണി അഹങ്കാരവും ധാര്‍ഷ്ട്യവും വെളിപ്പെടുത്തുകയാണ്. കേരളത്തില്‍ തെറി വിളിക്കുന്നതാണോ നാടന്‍ ഭാഷയാണെന്ന് അവര്‍ ചോദിച്ചു.
രാഷ്ട്രീയ പാര്‍ട്ടികളും സാമുദായിക സംഘടനകളും നേതാക്കളുമെല്ലാം ഒഴിഞ്ഞു നിന്ന രണ്ടു ദിനങ്ങള്‍ക്കു ശേഷം പെമ്പളൈ ഒരുമൈ സമരവേദി ഇന്നലെ വീണ്ടും സജീവമായി. ഹിന്ദു ഐക്യ വേദിയുടെ സംസ്ഥാന ഭാരവാഹികളായ സ്വാമി നിത്യാനന്ദ ദേവ ചൈതന്യ, നരേന്ദനാഥ്. കെ.പി.സന്തോഷ് എന്നിവര്‍ പ്രസംഗിച്ചു. രാഷ്ട്രീയ പാര്‍ട്ടികളുടെയും മറ്റു നേതാക്കളുടെയും സാന്നിധ്യം അകന്നു നിന്ന രണ്ടു ദിനങ്ങള്‍ക്കു ശേഷം സമരപ്പന്തല്‍ അല്‍പം സജീവമായത് ഇന്നലെയാണ്.
അതിനിടെ, മന്ത്രി മണി സമരപ്പന്തലിലെത്തി മാപ്പ് പറയണമെന്ന നിലപാടില്‍ പെമ്പിളൈ ഒരുമൈ മാറ്റം വരുത്തി. മന്ത്രി രാജിവയ്ക്കുക, തോട്ടം തൊഴിലാളികള്‍ക്ക് ഒരേക്കര്‍ ഭൂമിയും വാസയോഗ്യമായ വീടും 600 രൂപ കൂലിയും നല്‍കുക എന്നീ ആവശ്യങ്ങളുന്നയിച്ചാണു സത്യഗ്രഹം.