കോട്ടയം: കോണ്‍ഗ്രസിന്റെ ചാക്ക് കട്ടില്‍ കണ്ട് പനിക്കേണ്ട ആവശ്യം കേരളാ കോണ്‍ഗ്രസിനില്ലെന്ന് സംസ്ഥാന ജനറല്‍ സെക്രട്ടറി  സ്റ്റീഫന്‍ ജോര്‍ജ്.
ഞങ്ങള്‍ക്ക് നല്ല കട്ടിലുണ്ട്. ഇപ്പോള്‍ ഏതായാലും കേരളാ കോണ്‍ഗ്രസിന് പനി വന്നിട്ടില്ല. എം.എം ഹസന്‍ തങ്ങളെ യു.ഡി.എഫിലേക്ക് ക്ഷണിച്ചപ്പോള്‍ പി.ടി തോമസ് ഉള്‍പ്പടെയുള്ള ആളുകള്‍ ഇത് കെ.പി.സി.സി ചര്‍ച്ച ചെയ്തിട്ടില്ലെന്ന് പറയുകയുണ്ടായി. കേരളാ കോണ്‍ഗ്രസിനെ വേണ്ട എന്ന് ഇപ്പോള്‍ കെ.സി ജോസഫ് പറയുന്നത് കെ.പി.സി.സിയുടെ തീരുമാനമാണോ എന്നറിയാന്‍ ആഗ്രഹമുണ്ടെന്നും അദ്ദേഹം പറഞ്ഞു.
കഴിഞ്ഞ ദിവസം കേരളാ കോണ്‍ഗ്രസിനെ രാപ്പകല്‍ അസഭ്യം പറഞ്ഞ കോണ്‍ഗ്രസുകാര്‍ക്ക് അഭിമാനം ലവലേശം എങ്കിലും ഉണ്ടെങ്കില്‍ വാഴപ്പള്ളി പഞ്ചായത്തില്‍ കേരളാ കോണ്‍ഗ്രസില്‍ നിന്ന് വാങ്ങിയ വോട്ട് വേണ്ടെന്ന് വെക്കണം. മുത്തോലി പഞ്ചായത്തില്‍ നടന്ന ഇലക്ഷന്‍ മാര്‍ക്‌സിസ്റ്റ് പാര്‍ട്ടിയുമായി ചേര്‍ന്ന് കോണ്‍ഗ്രസ് ബഹിഷ്‌കരിച്ചത് കോണ്‍ഗ്രസും മാര്‍ക്‌സിസ്റ്റ് പാര്‍ട്ടിയും തമ്മിലുള്ള പുതിയ ബാന്ധവത്തിന്റെ തുടക്കമാണോ എന്ന് വ്യക്തമാക്കണം.
ഇണയെ തിന്നുന്ന പെണ്‍ചിലന്തിയെപ്പോലെ കോണ്‍ഗ്രസ് ഘടകകക്ഷികളെ ഓരോന്നായി തിരഞ്ഞ് പിടിച്ച് ഇല്ലാതാക്കാനാണ് ശ്രമിച്ചിരുന്നതെന്നും സ്റ്റീഫന്‍ ജോര്‍ജ്  പറഞ്ഞു.