ന്യൂഡല്‍ഹി: കൊവിഡ് ലോക്ക് ഡൗണിനെ തുടര്‍ന്നു നിര്‍ത്തിവച്ച സിനിമ, ടെലിവിഷന്‍ പ്രോഗ്രാം ഷൂട്ടിങുകള്‍ തുടങ്ങാന്‍ കേന്ദ്ര വാര്‍ത്താവിതരണ മന്ത്രാലയം അനുമതി നല്‍കി. ഇതിനായുള്ള മാര്‍ഗനിര്‍ദേശങ്ങളും പ്രത്യേക പ്രവര്‍ത്തന മാനദണ്ഡങ്ങളും കേന്ദ്ര സര്‍ക്കാര്‍ പുറപ്പെടുവിച്ചു. അഭിനേതാക്കള്‍ ഒഴികെയുള്ളവര്‍ക്ക് മാസ്‌ക് നിര്‍ബന്ധമാണ്. മേക്കപ്പ് ആര്‍ട്ടിസ്റ്റുകളും ഹെയര്‍ സ്‌റ്റൈലിസ്റ്റുകളും പി.പി.ഇ കിറ്റ് ധരിക്കണം. ആള്‍ക്കൂട്ടത്തിനിടയില്‍ പോലുള്ള പകര്‍ച്ചാ സാധ്യതയുള്ളിടങ്ങളില്‍ ഷൂട്ട് ചെയ്യുമ്പോള്‍ സിനിമാ പ്രവര്‍ത്തകര്‍ മാസ്‌കുകള്‍ ധരിക്കുക, ഇടയ്ക്കിടെ കൈ കഴുകുക, ഹാന്‍ഡ് സാനിറ്റൈസര്‍ വിതരണം ചെയ്യുക തുടങ്ങിയ അധിക മുന്‍കരുതലുകള്‍ എടുക്കണം.
കാമറയും മറ്റു ഉപകരണങ്ങളും കൈകാര്യം ചെയ്യുന്നവര്‍ കൈയുറ ധരിക്കണം. കോളര്‍ മൈക്കുകള്‍ പരമാവധി ഒഴിവാക്കണം. മൈക്കുകളുടെ ഡയഫ്രത്തിലേക്ക് നേരിട്ടുള്ള കോണ്‍ടാക്ട് ഒഴിവാക്കണം. പ്രോപ്പ്‌സ് പോലുള്ളവ പരമാവധി ഒഴിവാക്കുകയോ ഉപയോഗിക്കുന്നവ സാനിറ്റൈസ് ചെയ്യുകയോ വേണം. വിഗ്ഗുകള്‍, സൗന്ദര്യവര്‍ധക വസ്തുക്കള്‍ തുടങ്ങിയവ ഒന്നിലധികം ആളുകള്‍ ഉപയോഗിക്കുന്നത് ഒഴിവാക്കണം. ടെലിവിഷന്‍ പ്രവര്‍ത്തകര്‍ കാമറാ ക്രൂ, കാസ്റ്റ് എണ്ണം പരമാവധി കുറക്കണം. തൊഴില്‍സ്ഥലത്ത് തുപ്പരുത്. ഷൂട്ടിങ് സ്ഥലത്ത് പ്രവേശിക്കുന്നിടത്ത് തെര്‍മല്‍ സ്‌കാനറുകള്‍ വേണം. പ്രവേശനം രോഗലക്ഷണങ്ങളില്ലാത്തവര്‍ക്ക് മാത്രമായിരിക്കണം.
ആരോഗ്യസേതു ആപ്പ് വേണമെന്നും ആറടി അകലം പാലിക്കണമെന്നും നിര്‍ദേശത്തിലുണ്ട്. ചിത്രീകരണത്തിന് അന്താരാഷ്ട്ര തലത്തിലുള്ള രീതികള്‍ പരിഗണിച്ചാണ് പ്രത്യേക മാനദണ്ഡങ്ങള്‍ക്ക് രൂപം നല്‍കിയതെന്ന് കേന്ദ്രം വ്യക്തമാക്കി. ക്വാറന്റൈന്‍, ഐസൊലേഷന്‍ എന്നിവ ഉള്‍പ്പെടെ ഈ മേഖലയില്‍ കേന്ദ്ര ആരോഗ്യ മന്ത്രാലയം പുറപ്പെടുവിച്ചിട്ടുള്ള മാര്‍ഗനിര്‍ദേശങ്ങള്‍ പാലിക്കണം. മാര്‍ഗനിര്‍ദേശം നടപ്പിലാക്കുന്നുണ്ടെന്ന് സംസ്ഥാനങ്ങള്‍ ഉറപ്പാക്കണമെന്നും കേന്ദ്രം നിര്‍ദേശിച്ചു.