കോട്ടക്കല്‍: വോട്ടെടുപ്പ് ദിനത്തിലും തിരക്കൊഴിയാതെ പൊന്നാനി മണ്ഡലം യു.ഡി. എഫ് സ്ഥാനാര്‍ഥി ഇ.ടി മുഹമ്മദ് ബഷീര്‍. രാവിലെ തന്നെ ജന്മദേശമായ വാഴക്കാട് പഞ്ചായത്തിലെ (ബൂത്ത് 42) മപ്രം ഗവ. എല്‍ പി സ്‌കൂളില്‍ വോട്ട് രേഖപ്പെടുത്തി. മലപ്പുറം പാര്‍ലമെന്റ് മണ്ഡലത്തിലായിരുന്നു ഇ.ടിയുടെ വോട്ട്. തികഞ്ഞ ആത്മ വിശ്വാസമാണുള്ളതെന്നും പൊന്നാനിയില്‍ മികച്ച ഭൂരിപക്ഷത്തോടെ വിജയിക്കുമെന്നും വോട്ട് ചെയ്ത ശേഷം ഇ.ടി മാധ്യമങ്ങളോട് പറഞ്ഞു.
പിന്നീട് പൊന്നാനി ലോക്‌സഭാ മണ്ഡലത്തിലെ ഏഴ് അസംബ്ലി നിയോജക മണ്ഡലങ്ങളിലുമെത്തി ബൂത്തുകള്‍ സന്ദര്‍ശിച്ചു. തിരൂരങ്ങാടിയില്‍ നിന്നായിരുന്നു തുടക്കം. കോട്ടക്കലില്‍ സമാപിച്ചു. പ്രവര്‍ത്തകരുമായി നേരില്‍ സംസാരിച്ചും, ഫോണിലും പ്രവര്‍ത്തനങ്ങള്‍ വിലയിരുത്തി. മണ്ഡലത്തിലെ വിവിധ ഭാഗങ്ങളില്‍ നിന്നുള്ള തെരഞ്ഞെടുപ്പ് വിവരങ്ങള്‍ അപ്പപ്പോള്‍ തന്നെ പ്രവര്‍ത്തകര്‍ അറിയിക്കുന്നുണ്ടായിരുന്നു. പ്രചാരണ രംഗത്തെ ആവേശം വോട്ടിംഗിലും പ്രതിഫലിച്ചതോടെ തികഞ്ഞ ആത്മവിശ്വാസത്തിലാണ് ഇ.ടി മുഹമ്മദ്ബഷീര്‍.