റിയാദ്: സഊദി ഭരണകൂടം നടപ്പാക്കുന്ന സാമ്പത്തിക പരിഷ്‌കരണങ്ങള്‍ രാജ്യത്തെ പുരോഗതിയിലേക്ക് നയിക്കുന്നതായും സാമ്പത്തിക മേഖലയ്ക്ക് വളര്‍ച്ചയേകുന്നതായും ഇന്റര്‍നാഷണല്‍ മോണിറ്ററി ഫണ്ട് (ഐഎംഎഫ്) റിപ്പോര്‍ട്ട് ചെയ്തു.

സാമ്പത്തിക പരിഷ്‌കാരങ്ങളുമായി മുന്നോട്ടു പോകുന്ന സഊദി അറേബ്യയുടെ പെട്രോളിതര വരുമാനത്തിലെ വളര്‍ച്ച ഈ വര്‍ഷം കൂടുതല്‍ മുന്നേറുമെന്നും വരുംവര്‍ഷങ്ങളിലും സാമ്പത്തിക വളര്‍ച്ച അതിവേഗം കുതിക്കുമെന്നും ഐഎംഎഫ് റിപ്പോര്‍ട്ട് വ്യക്തമാക്കി.

ഈ വര്‍ഷം മൊത്തം ആഭ്യന്തരോത്പാദത്തനത്തിന്റെ 1.9 ശതമാനം വളര്‍ച്ചയാണ് പ്രതീക്ഷിക്കുന്നതെന്നും പെട്രോളിതര മേഖലയില്‍ 2.3 ശതമാനം വളര്‍ച്ചയാണ് പ്രതീക്ഷിക്കുന്നതെന്നും ഐ എം റിപ്പോര്‍ട്ട് വ്യക്തമാക്കി.

ഈ വര്‍ഷത്തെ മൊത്തം കമ്മി ബജറ്റ് മൊത്തം ആഭ്യന്തരോത്പാദനത്തിന്റെ 4.6 ശതമാനമായി കുറയുമെന്നാണ് പ്രതീക്ഷ. അടുത്ത വര്‍ഷം 1.9 ശതമാനമായും കുറയും.

കഴിഞ്ഞ വര്‍ഷം സഊദിയുടെ ബജറ്റ് കമ്മി 9.3 ശതമായിരുന്നു. സഊദി ദേശീയ എണ്ണക്കമ്പനിയും ലോകത്തെ തന്നെ ഏറ്റവും വലിയ കമ്പനികളില്‍ മുന്നില്‍ നില്‍ക്കുന്നതുമായ സഊദി അരാംകോയുടെ ഓഹരികള്‍ അടുത്ത വര്‍ഷം വില്‍പ്പന നടത്തിയേക്കുമെന്നാണ് കരുതുന്നത്.

സഊദി അരാംകോയുടെ ഒരു വിഹിതം ഓഹരി മാര്‍ക്കറ്റില്‍ ലിസ്റ്റ് ചെയ്യും. ഓഹരി വിപണിയിലെ ആനുകൂല്യ സാഹചര്യം, എണ്ണസംസ്‌കരണ , വന്‍കിട കമ്പനികളുടെ ഓഹരികള്‍ വാങ്ങുന്നതിനുള്ള അരാംകോയുടെ നീക്കം എന്നിവയെ ആശ്രയിച്ചായിരിക്കും ഓഹരി വില്‍പ്പന നടത്തുകയെന്നാണ് സഊദി ഊര്‍ജ്ജ മന്ത്രിയുടെ വെളിപ്പെടുത്തല്‍.