തിരുവനന്തപുരം: പ്രളയക്കെടുതിയില്‍ വീട് നഷ്ടപ്പെട്ട ആയിരം പേര്‍ക്ക് വീട് നിര്‍മിക്കുന്ന കെ.പി.സി.സിയുടെ പദ്ധതിയില്‍ മുതിര്‍ന്ന കോണ്‍ഗ്രസ് നേതാക്കളുടെ കുടുംബങ്ങള്‍ പങ്കാളികളാവും. ഉമ്മന്‍ ചാണ്ടി, രമേശ് ചെന്നിത്തല, എം.എം ഹസന്‍ എന്നിവരുടെ കുടുബാംഗങ്ങളാണ് പങ്കാളികളാവുക. ഓരോ വീടുകളാണ് ഇവര്‍ നിര്‍മിച്ചു നല്‍കുന്നത്.
കോണ്‍ഗ്രസ് പോഷക സംഘടനകളും സര്‍വിസ് സംഘടനകളും പദ്ധതിയില്‍ പങ്കുചേരും. കെ.പി.എസ്.ടി.എ അഞ്ച് വീടുകള്‍ നല്‍കുമെന്നു സംസ്ഥാന പ്രസിഡന്റ് ഹരിഗോവിന്ദന്‍ അറിയിച്ചു. നാളെ ആലപ്പുഴ ക്യാംപിലോട്ട് കണ്‍വന്‍ഷന്‍ സെന്ററില്‍ നടക്കുന്ന ചടങ്ങില്‍ ആലപ്പുഴ ഡി.സി.സിയുടെ ഒരു വീട് നിര്‍മിക്കുന്നതിന്റെ ചെക്ക് പ്രസിഡന്റ് എം. ലിജു രാഹുല്‍ ഗാന്ധിക്ക് കൈമാറും. അഞ്ച് ലക്ഷം രൂപയുടെ ആയിരം വീടുകളാണ് നിര്‍മിച്ചു നല്‍കുന്നത്. മണ്ഡലം കമ്മിറ്റികള്‍ ഒരു വീട് ഏറ്റെടുക്കും.
ഇതിനായി 'തൗസന്റ് ഹോംസ് റീലീഫ് ഫണ്ട് ' എന്ന പ്രത്യേക അക്കൗണ്ട് തുടങ്ങിയതായും കെ.പി.സി.സി അധ്യക്ഷന്‍ എം.എം ഹസന്‍ അറിയിച്ചു. വീടുകളുടെ നിര്‍മാണത്തിന് രാജ്യത്തെ മറ്റ് പ്രദേശ് കോണ്‍ഗ്രസ് കമ്മിറ്റികളുടെയും പോഷക സംഘടനകളുടെയും സഹായം അഭ്യര്‍ഥിക്കും. ഒക്ടോബറോടെ ആയിരം സ്‌പോണ്‍സര്‍മാരെ കണ്ടെത്തുമെന്നും എം.എം ഹസന്‍ പറഞ്ഞു.
ദുരിതാശ്വാസ ക്യാംപില്‍ നിന്നും മടങ്ങുന്നവര്‍ പാസ് ബുക്കും ചെക്കും വരെ നഷ്ടപ്പെട്ടവരാണ്. അതിനാല്‍ സര്‍ക്കാര്‍ നല്‍കുന്ന തുക അവര്‍ക്ക് നേരിട്ട് നല്‍കണം.
റവന്യു, കൃഷി വകുപ്പ് ഉദ്യോഗസ്ഥരെയും സന്നദ്ധ പ്രവര്‍ത്തകരെയും ഉള്‍പ്പെടുത്തി ജന ജാഗ്രതാ കമ്മിറ്റി ഉണ്ടാക്കണമെന്നും അല്ലാതെ നാശനഷ്ടം തിട്ടപ്പെടുത്തുന്നത് അപകടകരമാണെന്നും ഹസന്‍ പറഞ്ഞു. റിലീഫ് ക്യാംപുകളില്‍ ഉയരുന്ന പാരാതികള്‍ പരിഹരിക്കണമെന്നും ക്യാംപുകളില്‍ പേര് രജിസ്റ്റര്‍ ചെയ്യാത്തവര്‍ക്കും തുക നല്‍കണമെന്നും അദ്ദേഹം പറഞ്ഞു.
മലയാളികളെ അധിക്ഷേപിച്ച അര്‍ണാബ് ഗോസ്വാമിയുടെ നിലപാട് പ്രതിഷേധാര്‍ഹമാണ്. കേരളത്തിലെ ജനങ്ങള്‍ റിപ്പബ്ലിക് ടി.വി ബഹിഷ്‌കരിക്കണം. രാജീവ് ചന്ദ്രശേഖര്‍ ഇതിനെ അനുകൂലിച്ചതോടെ അദ്ദേഹത്തിന്റെ മലയാളി എന്ന വിശേഷണത്തിന് അര്‍ഥമില്ലാതായിരിക്കുന്നുവെന്നും എം.എം ഹസന്‍ പറഞ്ഞു.