തെഹ്‌റാന്‍: ഇറാന്‍ ധനമന്ത്രിയെ പാര്‍ലമെന്റ് ഇംപീച്ച് ചെയ്തു. രാജ്യത്തെ സമ്പദ്ഘടന പ്രതിസന്ധി നേരിടുകയും ഇറാന്‍ റിയാലിന്റെ മൂല്യം തകര്‍ന്നടിയുകയും ചെയ്യുന്നതിനിടെയാണ് മസ്ഊദ് കര്‍ബസിയാനെതിരേ പാര്‍ലമെന്റില്‍ വിശ്വാസ വോട്ടെടുപ്പ് നടന്നത്. 137 പേര്‍ എതിര്‍ത്തും 121 പേര്‍ അനുകൂലിച്ചും വോട്ട് ചെയ്തപ്പോള്‍ രണ്ടുപേര്‍ വിട്ടുനിന്നു.
ഒറ്റ മാസത്തിനിടെ ഹസന്‍ റൂഹാനി മന്ത്രിസഭയില്‍നിന്നു പുറത്താകുന്ന രണ്ടാമത്തെ മന്ത്രിയാണ് മസ്ഊദ്. നേരത്തെ തൊഴില്‍ മന്ത്രി അലി റബീഇയും വിശ്വാസ വോട്ടെടുപ്പില്‍ പരാജയപ്പെട്ടിരുന്നു. ഇറാന്‍ ആണവ കരാറിനെതിരായ അമേരിക്കയുടെ നീക്കവും അവരുടെ ഉപരോധവുമല്ല, കാര്യക്ഷമമല്ലാത്ത ഭരണവും ആസൂത്രണമില്ലായ്മയുമാണു സാമ്പത്തിക തകര്‍ച്ചയുടെ കാരണമെന്നാണു പ്രതിപക്ഷം ഉന്നയിക്കുന്ന ആരോപണം.
സര്‍ക്കാരിന്റെ തെറ്റായ തീരുമാനങ്ങള്‍ ജനങ്ങളുടെ ജീവിതം തകര്‍ക്കുകയും ജനങ്ങളെ പൊതുസ്വത്ത് കൊള്ളയടിക്കുന്നതിലേക്കു നയിക്കുകയും ചെയ്‌തെന്ന് കണ്‍സര്‍വേറ്റിവ് എം.പി അബ്ബാസ് പയിസാദ പറഞ്ഞു.
കഴിഞ്ഞ ഡിസംബറിലാണ് ഇറാനില്‍ സാമ്പത്തിക പരിഷ്‌കരണങ്ങളെ തുടര്‍ന്നുള്ള പ്രക്ഷോഭത്തിനു തുടക്കമായത്. തലസ്ഥാനമായ തെഹ്‌റാനില്‍ തുടങ്ങി 80ഓളം നഗരങ്ങളിലേക്കു വ്യാപിച്ച പ്രക്ഷോഭത്തിനിടെ 25 പേര്‍ക്കു ജീവന്‍ നഷ്ടപ്പെടുകയും ചെയ്തു.