ബറേലി: ലോകവ്യാപകമായി പ്രചരിക്കുന്ന തീവ്രവാദ പ്രത്യയ ശാസ്ത്രങ്ങളെ ശക്തമായി പ്രതിരോധിക്കണമെന്ന് ഇന്ത്യന്‍ ഗ്രാന്‍ഡ് മുഫ്തി മൗലാനാ മുഫ്തി അസ്ജദ് ഖാന്‍.

ഈസ്റ്റര്‍ ദിനത്തില്‍ ശ്രീലങ്കയിലെ വിവിധയിടങ്ങളില്‍ നടന്ന സ്‌ഫോടന പരമ്പരയെ അതിശക്തമായി അപലപിച്ച്, ബറേല്‍വി പണ്ഡിത സഭയായ ജമാഅത്ത് റസായെ മുസ്തഫയുടെ പേരില്‍ പുറത്തിറക്കിയ ഔദ്യോഗിക വാര്‍ത്താകുറിപ്പിലാണ് അദ്ദേഹം ഇക്കാര്യം പ്രസ്താവിച്ചത്.
സര്‍വ തീവ്രവാദ അക്രമണങ്ങളെയും ഞങ്ങള്‍ അപലപിക്കുന്നു. ശ്രീലങ്കയിലെ നിരപരാധികളായ പൗരന്മാരുടെ കൊലപാതകത്തിന് കാരണമായ ചാവേര്‍ ആക്രമണം അത്യന്ത്യം ഹീനവും ഭയാനകവുമാണെന്നും സംഭത്തില്‍ നടുക്കം രേഖപ്പെടുത്തുന്നതായും അദ്ദേഹം പറഞ്ഞു. ഇത്തരം പൈശാചികമായ തീവ്ര ആശയങ്ങളെ എല്ലാ അര്‍ത്ഥത്തിലും എതിര്‍ക്കേണ്ടതും അവരുടെ സാമ്പത്തിക സ്രോതസ്സുകള്‍ ഇല്ലാതാക്കേണ്ടതുമാണ്. ഇത് വിവിധ രാജ്യങ്ങളിലെ ഭരണാധികാരികളുടെ ഉത്തരവാദിത്വമാണെന്നും അദ്ദേഹം പറഞ്ഞു.

പുതിയ ഗ്രാന്‍ഡ് മുഫ്തിയായി തെരഞ്ഞെടുത്തതിനു ശേഷം, അന്തര്‍ദേശീയ വിഷയത്തിലുള്ള അദ്ദേഹത്തിന്റെ ആദ്യ പ്രസ്താവനയാണിത്.
കഴിഞ്ഞ മാസം 31 നാണ് ഇന്ത്യയുടെ പുതിയ ഗ്രാന്‍ഡ് മുഫ്തിയായും നിര്യാതനായ ഗ്രാന്‍ഡ് മുഫ്തി താജുശ്ശരീഅ മൗലാനാ അഖ്തര്‍ റസാഖാന്‍ അസ്ഹരിയുടെ പിന്‍ഗാമിയായും മുഫ്തി അസ്ജദ് റസാഖാന്‍ ബറേല്‍വിയെ തെരഞ്ഞെടുത്തത്.
ബറേല്‍വി മുസ്്‌ലിംകളുടെ ആസ്ഥാന മന്ദിരമായ ബറേലി ശരീഫില്‍ നടന്ന ശരീഅത്ത് കൗണ്‍സില്‍ ഓഫ് ഇന്ത്യയുടെ പതിനാറാമത് സംഗമത്തിലായിരുന്നു പുതിയ ഗ്രാന്‍ഡ് മുഫ്തിയെ ഔദ്യോഗികമായി പ്രഖ്യാപിച്ചത്.