കോവളം : ശക്തമായ തിരയില്‍പെട്ട് ആടിയുലഞ്ഞ് വിഴിഞ്ഞം വാര്‍ഫിലെ ബോള്ളാഡുകള്‍ തകര്‍ക്കുന്ന ഗുജറാത്തി ടഗ്ഗ്
അധികൃതര്‍ക്കു തലവേദനയാകുന്നു.
കഴിഞ്ഞ ദിവസം ആടിയുലഞ്ഞ ടഗ്ഗ് വാര്‍ഫിലെ നങ്കൂരം തകര്‍ത്തിരുന്നു. ഇതോടെ ടഗ്ഗില്‍ അവശേഷിച്ച മലയാളികള്‍ ഉള്‍പ്പെടെയുള്ള അഞ്ച് ജീവനക്കാര്‍ ഭയാശങ്കയിലായി. ടഗ്ഗ് നിയന്ത്രണം വിട്ട് കടലിലേക്ക് ഒഴുകിയാല്‍  എത്രയും വേഗം രക്ഷപ്പെടണമെന്ന് അധികൃതര്‍ ഇവര്‍ക്കു നിര്‍ദേശം നല്‍കിയിട്ടുണ്ട്.
കഴിഞ്ഞ ദിവസം ബന്ധിച്ചിരുന്ന കൂറ്റന്‍ വള്ളങ്ങളും ബൊള്ളര്‍ഡും തകര്‍ത്ത് കടലിലേക്ക് ഒഴുകാന്‍ ശ്രമിച്ച ടഗ്ഗിനെ പോര്‍ട്ട് ഓഫിസര്‍ മോഹന്‍ദാസ് വാര്‍ഫ് സൂപ്പര്‍വൈസര്‍ അനില്‍കുമാര്‍ പോര്‍ട്ട് കണ്‍സര്‍വേറ്റര്‍ പ്രദീപ്കുമാര്‍ ടഗ്ഗ് മാസ്റ്റര്‍ ശശി കുമാര്‍ ഉള്‍പ്പെടെയുള്ളവര്‍ മണിക്കൂറുകള്‍ പരിശ്രമിച്ചാണ്  ബന്ധിച്ചത്. കരയില്‍ ബന്ധിച്ചിരുന്ന നാല് വടങ്ങളില്‍ മൂന്നും പൊട്ടിച്ചെറിഞ്ഞ് അധികമായി രണ്ട് ബൊള്ളാര്‍ഡുകളും തകര്‍ത്ത് അപകടാവസ്ഥയിലായ ടഗ്ഗിനെ  നിയന്ത്രണവിധേയമാക്കാന്‍ മണിക്കൂറുകളെടുത്തു.
കടല്‍ക്ഷോഭം കാരണം കരയിലേക്ക് അടിച്ച് കയറുന്ന വന്‍ തിരയില്‍ ആടിയുലഞ്ഞ് അപകടാവസ്ഥയിലായ ടഗ്ഗ് ഒരാഴ്ച്ചയായി പോര്‍ട്ട് അധികൃതരുടെ ഉറക്കംകെടുത്തുകയാണ്.നേരത്തെ സുരക്ഷിതമല്ലെന്ന് കണ്ട് പഴയവാര്‍ഫിലേക്ക് മാറ്റിയ ടഗ്ഗ് ചൊവാഴ്ച്ച രാവിലെ രണ്ട് ബൊള്ളാര്‍ഡും ഒരു വടവും തകര്‍ത്തിരുന്നു.അപകടം മുന്നില്‍ കണ്ട അധികൃതര്‍ കൂടുതല്‍ വടം ഉപയോഗിച്ച് ബന്ധിച്ച് നിര്‍ത്താന്‍ ജീവനക്കാര്‍ക്ക് നിര്‍ദേശം നല്‍കി.അതിന് ശേഷം ബന്ധിച്ച ബൊള്ളാര്‍ഡും വടവുമാണ് ഇന്നലെ രാത്രി തകര്‍ന്നത്.മത്സ്യബന്ധന സീസണ്‍ സമയമായതിനാല്‍ തുറമുഖത്ത് മൂവായിരത്തോളം ചെറുതും വലുതുമായ വള്ളങ്ങള്‍ നങ്കൂരമിട്ടിട്ടുണ്ട്. ഇവയുടെ സുരക്ഷിതത്വവും ആശങ്കയിലായിട്ടുണ്ട്.
ടഗ്ഗിനെ പുതിയ വാര്‍ഫിലേക്ക് മാറ്റാന്‍ ഇന്നലെ നടത്തിയ ശ്രമവും ഫലം കണ്ടില്ല.ടഗ്ഗിനെ ബന്ധിക്കാന്‍  അവിടെയുള്ള  കോസ്റ്റ് ഗാര്‍ഡിന്റെ കപ്പല്‍ മാറ്റണമെന്നാവശ്യപ്പെട്ട അധികൃതര്‍ കത്തു നല്‍കിയിട്ടും കോസ്റ്റ് ഗാര്‍ഡ് മറുപടി നല്‍കിയിട്ടില്ല. അതേ സമയം നിയന്ത്രണം വിടുന്ന ടഗ്ഗ് വള്ളങ്ങളിലിടിച്ചാല്‍ ക്രമസമാധാന പ്രശ്‌നങ്ങളുണ്ടാകുമോയെന്ന ആശങ്കയും ഉയര്‍ന്നിട്ടുണ്ട്.