കോഴിക്കോട്: സ്വകാര്യ ബസുകളുടെ മൂന്നു മാസത്തെ നികുതി ഒഴിവാക്കി. സ്വകാര്യ ബസുകളുടെയും ടൂറിസ്റ്റ്് ബസുകളുടെയും ജൂലൈ ഒന്ന് മുതല്‍ മൂന്ന് മാസത്തേയും സ്‌കൂള്‍ ബസുകളുടെ ഏപ്രില്‍ മുതലുളള ആറ് മാസത്തെയും വാഹന നികുതി ഒഴിവാക്കുന്നതിന് മന്ത്രിസഭാ യോഗം തീരുമാനിച്ചതായി ഗതാഗത മന്ത്രി എ.കെ ശശീന്ദ്രന്‍ അറിയിച്ചു. നികുതി ഇളവ് നല്‍കിയത് പരിഗണിച്ച് നിര്‍ത്തിവച്ച ബസ് സര്‍വിസ് ഓണക്കാലത്തു തന്നെ പുനരാരംഭിക്കാന്‍ സ്വകാര്യ ബസുടമകളോട് മന്ത്രി അഭ്യര്‍ഥിച്ചു.

സംസ്ഥാനത്ത് സര്‍വിസ് നടത്തിക്കൊണ്ടിരുന്ന 15,840 സ്വകാര്യ ബസുകളില്‍ 12,433 എണ്ണം സര്‍വിസ് നിര്‍ത്തിവച്ചു വാഹന നികുതി ഒഴിവാക്കുന്നതിനുളള ജി ഫോം നല്‍കിയിട്ടുണ്ട്. സ്വകാര്യ ബസുകള്‍ സര്‍വിസ് നിര്‍ത്തിവച്ചതോടെ ജനങ്ങള്‍ക്കുണ്ടായ യാത്രാദുരിതം ശ്രദ്ധയില്‍പ്പെട്ടതിനെ തുടര്‍ന്നാണ് സര്‍ക്കാരിന് വന്‍ വരുമാന നഷ്ടമുണ്ടാകുമെങ്കിലും നികുതി ഒഴിവാക്കാന്‍ തീരുമാനിച്ചതെന്നും മന്ത്രി പറഞ്ഞു. നികുതികള്‍ ഒഴിവാക്കിയതിലൂടെ സര്‍ക്കാരിന് 99 കോടിയുടെ വരുമാന നഷ്ടമുണ്ടാകുമെന്നും മന്ത്രി പറഞ്ഞു.