കോട്ടയം: ദുരിതാശ്വാസ ക്യാംപില്‍ ബ്ലേഡ് പിരിവിനായി ഗുണ്ടായിസം കാണിച്ച രണ്ടുപേര്‍ പിടിയില്‍. നഗരത്തിലെ ബ്ലേഡ് മാഫിയ സംഘത്തിലെ പെരുമ്പായിക്കാട് സ്വദേശികളായ മനയില്‍ വീട്ടില്‍ മാക്‌സിന്‍ ജോര്‍ജ് (39), ഷാജിമോന്‍ മജീദ് (37)എന്നിവരാണ് അറസ്റ്റിലായത്.
നഗരത്തില്‍ കെ.എസ്.ആര്‍.ടി.സി ബസ് സ്റ്റാന്‍ഡിനു സമീപം പ്രവര്‍ത്തിക്കുന്ന സംഘത്തിലെ പ്രധാനികളാണ് പിടിയിലായത്. ദുരിതാശ്വാസ ക്യാംപില്‍ ബ്ലേഡ് പലിശക്ക് പണം കടംകൊടുത്തതായുള്ള പരാതിയിലാണ് ഈ സംഘത്തിലെ രണ്ടുപേരെ പിടികൂടിയത്. ഇവര്‍ ഇപ്പോള്‍ ദുരിതാശ്വാസ ക്യാംപില്‍ കഴിയുന്ന പലര്‍ക്കും പണം കൊടുത്തിട്ടുള്ളതായി പൊലിസ് പറഞ്ഞു.
ക്യാംപില്‍ നിസഹായ അവസ്ഥയില്‍ കഴിയുന്ന പല പാവപ്പെട്ട ആളുകളേയും ഭീഷണിപ്പെടുത്തി പണം ചോദിച്ചതായി രഹസ്യവിവരം ലഭിച്ചതിന്റെ അടിസ്ഥാനത്തിലാണ് റെയ്ഡ് നടത്തിയത്. ഇവരുടെ കൈയില്‍നിന്ന് മുദ്രപത്രങ്ങളും ഒപ്പിട്ട സ്റ്റാമ്പ് പേപ്പറുകളും വാഹനങ്ങളുടെ ആര്‍.സി ബുക്കുകളും വാഹനങ്ങളും കണ്ടെടുത്തു.