തിരുവനന്തപുരം: സംസ്ഥാനത്തെ സ്‌കൂള്‍ ഓണ്‍ലൈന്‍ ക്ലാസ് ഫസ്റ്റ് ബെല്ലില്‍ കായിക വിനോദ പരിശീലനത്തിന് കരിക്കുലവുമായി ബന്ധമില്ലാത്തവര്‍. യോഗ അസോസിയേഷന്റെയും ഒളിംപിക് അസോസിയേഷന്റെയും കായികവിനോദ ക്ലാസ്സുകളാണ് കഴിഞ്ഞ ദിവസങ്ങളില്‍ സംപ്രേഷണം ചെയ്തത്. ഇതിനെതിരെ സംസ്ഥാനത്തെ കായിക അധ്യാപകര്‍ രംഗത്തെത്തി.
ഫസ്റ്റ് ബെല്‍ ക്ലാസുകള്‍ ആരംഭിച്ചിട്ട് മാസങ്ങളായെങ്കിലും കായിക പരിശീലന ക്ലാസുകള്‍ കഴിഞ്ഞ ദിവസമാണ് ആരംഭിച്ചത്. ആരോഗ്യ, കായിക വിദ്യാഭ്യാസവുമായി ബന്ധപ്പെട്ടുള്ള ക്ലാസുകള്‍ നിലവിലുള്ള കരിക്കുലം അടിസ്ഥാനപ്പെടുത്തിയാണ് നടക്കേണ്ടത്. എന്നാല്‍ ഒളിംപിക്, യോഗ അസോസിയേഷനുകള്‍ ഷൂട്ട് ചെയ്ത ക്ലാസുകളാണ് കഴിഞ്ഞ ദിവസം സംപ്രേഷണം ചെയ്തത്.
സംസ്ഥാനത്തെ കായിക അധ്യാപകരെയും കരിക്കുലത്തെയും നോക്കുകുത്തിയാക്കിയാണ് നടപടി. സംഘടനകള്‍ രാഷ്ട്രീയ സ്വാധീനം ഉപയോഗിച്ച് വിക്ടേഴ്‌സ് ചാനല്‍ വഴി ക്ലാസുകള്‍ സംപ്രേഷണം ചെയ്യുകയാണ്. ഇന്നലെ രാവിലെ നടന്ന 15 മിനുട്ട് ക്ലാസ് അവരുടേതായിരുന്നു. കായിക ക്ലാസ് എന്നതിന് പകരം പൊതുവിഷയം എന്ന രീതിയിലാണ് ക്ലാസുകള്‍ സംപ്രേഷണം ചെയ്തത്.
എസ്.സി.ഇ.ആര്‍.ടി അറിയാതെ ക്ലാസുകള്‍ ഷൂട്ട് ചെയ്ത് സംപ്രേഷണം ചെയ്യുന്നതിന് പിന്നില്‍ സംഘടനകളിലെ ഉന്നത രാഷ്ട്രീയ ബന്ധമാണെന്നാണ് ആരോപണം. കരിക്കുലത്തെ അടിസ്ഥാനമാക്കിയുള്ള ക്ലാസുകള്‍ സംപ്രേഷണം ചെയ്യണമെന്ന കരിക്കുലം കമ്മിറ്റിയുടെ നിര്‍ദേശവും കാറ്റില്‍പറത്തി. സംഭവം ചര്‍ച്ചയായതോടെ കരിക്കുലം പ്രകാരമുള്ള ക്ലാസുകള്‍ ഷൂട്ട് ചെയ്യുന്നതിനുള്ള തീരുമാനമായിട്ടുണ്ടെന്നാണ് വിവരം.