ഏത്തടുക്ക: വൈദ്യുത ലൈനില്‍ പടര്‍ന്നുപിടിച്ച കാട്ടുവള്ളി അപകട ഭീഷണി ഉയര്‍ത്തുന്നു. കുംബഡാജെ പഞ്ചായത്തിലെ ഏത്തടുക്ക യു.പി സ്‌കൂളിന് സമീപത്തായി പാതയോരത്ത് സ്ഥിതി ചെയ്യുന്ന വൈദ്യുതത്തൂണിലെ എച്ച്.ടി ലൈനിലാണ് താഴെഭാഗത്തു നിന്നും കാട്ടുവള്ളി പടര്‍ന്നിട്ടുള്ളത്.
ഇതിന് സമീപത്തുകൂടിയാണ് സ്‌കൂള്‍ വിദ്യാര്‍ഥികളടക്കമുള്ള നിരവധി യാത്രക്കാര്‍ കടന്നുപോകുന്നത്. എന്നാല്‍ വൈദ്യുതിലൈനില്‍ തട്ടി നില്‍ക്കുന്ന കാട്ടുവള്ളി നീക്കം ചെയ്യണമെന്നാവശ്യപ്പെട്ട് നിരവധി തവണ അധികൃതര്‍ക്ക് പരാതി നല്‍കിയെങ്കിലും യാതൊരു നടപടിയും കൈക്കൊണ്ടിട്ടില്ലെന്ന് നാട്ടുകാര്‍ പറയുന്നു. ദുരന്തം സംഭവിക്കുന്നതിന് മുന്‍പ് വൈദ്യുതി ലൈനില്‍ തട്ടി നില്‍ക്കുന്ന വള്ളി നീക്കം ചെയ്യണമെന്നാണ് നാട്ടുകാരുടെ ആവശ്യം.