റിയാദ്: സഊദിയിൽ ഭീകരക്രമണ കേസിൽ ഏഴ് പേർക്ക് വധ ശിക്ഷ വിധിച്ചു. 2014 ൽ കിഴക്കൻ സഊദിയിലെ അൽ ഹസയിലെ അദ്ദാൽവ ഗ്രാമത്തിനു നേരെയുണ്ടായ ഭീകരാക്രമണത്തിൽ പങ്കെടുത്ത പ്രതിളിലെ ഏഴ് പേർക്കെതിരെയാണ് റിയാദ് സ്പെഷ്യൽ ക്രിമിനൽ കോർട്ട് വധ ശിക്ഷക്ക് വിധിച്ചത്.

       ഭീകരാക്രമണത്തിൽ പങ്കെടുത്ത മറ്റു 3 പ്രതികൾക്ക് 25 വർഷം ജയിൽ ശിക്ഷയും വിധിച്ചിട്ടുണ്ട്. വധ ശിക്ഷ നടപ്പാക്കിയ ശേഷം നാലു പ്രതികളുടെ ഉടൽ പൊതു സ്ഥലത്ത് പ്രദർശിപ്പിക്കണമെന്നും വിധിയിൽ പറയുന്നുണ്ട്.

       വിധി പ്രസ്താവിക്കുന്ന സമയത്ത് കോടതിയിൽ പത്ത് പ്രതികളും ഹാജരായിരുന്നു. രണ്ട് പ്രതികൾ എത്തിയിരുന്നില്ല. ഒന്ന് മുതൽ നാല് വരെയുള്ള പ്രതികളെയാണ് വധശിക്ഷക്ക് ശേഷം ഉടൽ പൊതു സ്ഥലത്ത് പ്രദർശിപ്പിക്കുക. 6, 7, 12 പ്രതികളെ വധശിക്ഷക്ക് വിധേയരാക്കും. 8, 10, 11 പ്രതികൾക്കാണ് 25 വർഷം തടവ് വിധിച്ചത്. ആക്രമണത്തിൽ പ്രതികൾക്കുള്ള പങ്കിനനുസരിച്ചാണു ശിക്ഷകൾ വിധിച്ചിട്ടുള്ളത്.

        2014 നവംബർ 3 നാണ് അൽ അഹ്സയിലെ അദ്ദാൽവ ഗ്രാമത്തിൽ ശിയാ ഹുസൈനിയ വിഭാഗത്തിനു നേരെ അക്രമികൾ മെഷീൻ ഗണും പിസ്റ്റളും ഉപയോഗിച്ച് ആക്രമണം നടത്തിയത്. സംഭവത്തിൽ സാധാരണക്കാരായ എട്ട് പേർ കൊല്ലപ്പെടുകയും 9 പേർക്ക് പരിക്കേൽക്കുകയും ചെയ്തിരുന്നു