റിയാദ്: സഊദിയില്‍ അനധികൃത താമസക്കാര്‍ക്കെതിരായ തിരച്ചിലില്‍ ഇതുവരെ പിടിയിലാവരുടെ എണ്ണം മുപ്പത് ലക്ഷം കവിഞ്ഞതായി ആഭ്യന്തര മന്ത്രാലയം അറിയിച്ചു. അനധികൃതരെ കണ്ടെത്താനുള്ള കാംപയിന്‍ ആരംഭിച്ച 2017 നവംബര്‍ മുതല്‍ ഇതുവരെയുള്ളവരുടെ കണക്കുകളാണ് മന്ത്രാലയം പ്രസിദ്ധീകരിച്ചത്.
പിടികൂടിയ അനധികൃത താമസക്കാരില്‍ കേസുകളോ മറ്റു പ്രശ്‌നങ്ങളോ നേരിടാത്ത ഏഴര ലക്ഷത്തിലധികം പേരെ ഇതിനകം നാട്ടിലേക്ക് തിരിച്ചയക്കുകയും ചെയ്തിട്ടുണ്ട്. ബാക്കിയുള്ളവര്‍ ഇതിനായി കാത്തുകിടക്കുകയോ മറ്റു നടപടിക്രമങ്ങള്‍ നേരിടുകയോ ആണ്.

ഇതുവരെ 30,30,767 അനധികൃത താമസക്കാരാണ് ആഭ്യന്തര മന്ത്രാലയത്തിന്റെ പിടിയിലായത്. ഇതില്‍ 23,61,511 പേരും താമസ രേഖകള്‍ ഇല്ലാത്തവരും താമസ നിയമലംഘനം നടത്തിയവരുമാണ്.
തൊഴില്‍ നിയമലംഘനത്തിന് പിടിയിലായത് 4,66,038 പേരും അതിര്‍ത്തി നിയമലംഘനം നടത്തിയതില്‍ 2,03,218 പേരുമാണെന്നു സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു. ഇതില്‍ നുഴഞ്ഞുകയറ്റക്കാര്‍ 51,313 പേരാണ്. ഇവരില്‍ 49 ശതമാനം പേരും അയല്‍ രാജ്യക്കാരായ യമനി പൗരന്മാരും 48 ശതമാനം എത്യോപ്യന്‍ പൗരന്മാരും മൂന്ന് ശതമാനം പേര്‍ മറ്റുള്ള രാജ്യക്കാരുമാണ്.

അതേസമയം, പിടികൂടിയ നിയമലംഘകരെ നാട്ടിലേക്ക് കയറ്റി വിടുന്ന നടപടികളും പുരോഗമിക്കുന്നുണ്ട്. നിലവില്‍ കാംപയിന്‍ ആരംഭിച്ചത് മുതല്‍ ഇതുവരെ 7,60,456 പേരെ അവരവരുടെ നാടുകളിലേക്ക് കയറ്റി അയച്ചിട്ടുണ്ട്. 5,14,400 അനധികൃതര്‍ യാത്രാ നപടികള്‍ പൂര്‍ത്തീകരിക്കുന്നതിന്റെ ഭാഗമായി വിമാന ടിക്കറ്റുകളുടെ ലഭ്യതക്കായും 4,10,123 പേരെ യാത്രാ രേഖകള്‍ ശരിയാക്കുന്നതിന് ബന്ധപ്പെട്ട എംബസികള്‍ക്ക് കൈമാറുകയും ചെയ്തിട്ടുണ്ട്.
ഇവര്‍ കൂടി നാട്ടിലേക്ക് തിരിച്ചാല്‍ സഊദിയില്‍ നിന്നും പുറത്താകുന്ന വിദേശികളുടെ എണ്ണം പതിനാറ് ലക്ഷം കവിയും. അനധികൃത താമസക്കാര്‍ക്ക്, താമസ, യാത്ര സൗകര്യം ചെയ്തുകൊടുത്തതിന്റെ പേരില്‍ 1,237 സ്വദേശികളെയും പിടികൂടിയതായി സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു.