കുണ്ടറ: കൊല്ലംതേനി ദേശീയപാതയില്‍ കിഴക്കേ കല്ലട പൊലിസ് സ്റ്റേഷന് സമീപം കാറും മിനി ലോറിയും കൂട്ടിയിടിച്ച് പൊലിസുകാരന്‍ ഉള്‍പ്പെടെ നാലുപേര്‍ക്ക് പരുക്കേറ്റു.
കഴിഞ്ഞദിവസം രാത്രി പത്തോടെയായിരുന്നു അപകടം. ചിറ്റുമലയില്‍ നിന്നും മൂന്നുമുക്കിലേക്ക് പോവുകയായിരുന്ന മിനി ലോറിയും ചിറ്റുമലയിലേക്ക് വന്ന കാറുമാണ് അപകടത്തിപ്പെട്ടത്. കാറോടിച്ചിരുന്ന അടൂര്‍ കെ.എ.പി ബറ്റാലിയനിലെ പൊലിസുകാരന്‍ കൊടുവിള അശ്വതിയില്‍ ജോജിന്‍ ജോസഫ് (28), തെക്കേമുറി ആരാമത്തില്‍ ഭരത്, ജിജോ ഹെന്റി, മിഥുന്‍ ബാബു എന്നിവര്‍ക്കാണ് പരുക്കേറ്റത്. അപകടത്തില്‍ കാറിന്റെ മുന്‍ഭാഗം പൂര്‍ണമായും തകര്‍ന്നു.
പരുക്കേറ്റവരെ നാട്ടുകാരും പൊലിസും ചേര്‍ന്ന് ശാസ്താംകോട്ടയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഗുരുതരമായി പരുക്കേറ്റ മിഥുന്‍ ബാബുവിനെയും ജോജിന്‍ ജോസഫിനെയും തിരുവനന്തപുരത്തേക്ക് മാറ്റി. കിഴക്കേ കല്ലട പൊലിസ് കേസെടുത്തു.