നെടുമ്പാശേരി: അന്താരാഷ്ട്ര വിമാനത്താവളം വഴി അനധികൃതമായി ദുബൈയിലേക്ക് കടത്താന്‍ ശ്രമിച്ച എട്ട് കിലോഗ്രാം കുങ്കുമപ്പൂവ് കസ്റ്റംസ് എയര്‍ ഇന്റലിജന്‍സ് വിഭാഗം പിടികൂടി. സ്‌പൈസ് ജെറ്റ് വിമാനത്തില്‍ ദുബൈയിലേക്ക് പോകാനെത്തിയ കാസര്‍കോട് സ്വദേശിയായ യാസര്‍ അറാഫത്ത് എന്ന യാത്രക്കാരനാണ് പിടിയിലായത്. ഇയാളുടെ ചെക്ക് ഇന്‍ ബാഗേജിനകത്താണ് കുങ്കുമപ്പൂവ് ഒളിപ്പിച്ചിരുന്നത്.

ലോകത്ത് തന്നെ ഏറ്റവും ഗുണനിലവാരമുള്ള കശ്മിരി കുങ്കുമപ്പൂവാണ് പിടികൂടിയത്. ഇന്ത്യയില്‍ ഇതിന് കിലോഗ്രാമിന് ശരാശരി 2.50 ലക്ഷം രൂപയാണ് വില. എന്നാല്‍ ഗള്‍ഫ് നാടുകളില്‍ എത്തിയാല്‍ 50 ലക്ഷം രൂപ വരെ വില ലഭിക്കും.
വിദേശ രാജ്യങ്ങള്‍ ലക്ഷ്യമാക്കി അനധികൃത ഇടപാടുകള്‍ നടത്തുന്ന സംഘമാണ് കുങ്കുമപ്പൂവ് കടത്തിന് പിന്നിലുള്ളത്. എന്നാല്‍ കുങ്കുമപ്പൂവ് എത്തിച്ച് കൊടുത്ത ആളെക്കുറിച്ചും ദുബൈയില്‍ വാങ്ങുവാന്‍ എത്തുമെന്ന് പറഞ്ഞവരെക്കുറിച്ചും യാതൊരു വിവരവും ലഭിച്ചിട്ടില്ല.
കാരിയറായി പ്രവര്‍ത്തിക്കുന്ന കാസര്‍കോട് സ്വദേശിക്ക് ദുബൈയില്‍ പോയി തിരികെ വരുന്നതിനുള്ള വിമാന ടിക്കറ്റും 20,000 രൂപയുമാണ് പ്രതിഫലമായി വാഗ്ദാനം ചെയ്തിരിക്കുന്നത്.