കൊണ്ടോട്ടി: പ്ലാസ്റ്റിക് ഉപയോഗവും വില്‍പ്പനയും തടയുന്നതിന്റെ ഭാഗമായി തദ്ദേശ സ്ഥാപനങ്ങള്‍ നിയമാവലി പുറത്തിറക്കി. ഈ വര്‍ഷം മുതല്‍ നടപ്പിലാക്കിവന്നിരുന്ന പ്ലാസ്റ്റിക് നിരോധനം കൊവിഡ് മൂലം കര്‍ശന നിലപാടുകളിലേക്ക് കടന്നിരുന്നില്ല. എന്നാല്‍ തദ്ദേശ സ്ഥാപനങ്ങളില്‍ പ്ലാസ്റ്റ് ഉപയോഗം, നിര്‍മാണം, വില്‍പ്പന, നിക്ഷേപം തുടങ്ങിയവ വര്‍ധിച്ചതോടെയാണ് നിയമാവലി പുറത്തിറക്കി നടപടികള്‍ കര്‍ശനമാക്കുന്നത്.
പ്ലാസ്റ്റിക് നിയമം ലംഘിച്ച് വില്‍പ്പന നടത്തുന്നവര്‍ക്ക് ആദ്യം 10,000 രൂപ പിഴ ഈടാക്കും. രണ്ടാംതവണയും നിയമം ലംഘിച്ചാല്‍ 25,000 രൂപയും മൂന്നാം തവണ 50,000 രൂപയുമാണ് പിഴ. ഇതു വീണ്ടും ലംഘിച്ചാല്‍ കടയുടെ െൈലസന്‍സ് റദ്ദാക്കും. കടകളില്‍ പ്ലാസ്റ്റിക് ബാഗുകള്‍ വില്‍ക്കില്ലെന്ന് അറിയിപ്പ് ബോര്‍ഡ് സ്ഥാപിക്കണം. പ്ലാസ്റ്റിക്കുകളില്‍ പൊതിഞ്ഞ് ഭക്ഷണ വിതരണത്തിന് നിരോധനവും ഏര്‍പ്പെടുത്തി.
സ്ഥാപനങ്ങള്‍, വഴിയോര കച്ചവടക്കാര്‍, കാറ്ററിംങ് യൂണിറ്റുകള്‍ തുടങ്ങിയവര്‍ പ്ലാസ്റ്റിക് മാലിന്യ നീക്കത്തിന് 20 മുതല്‍ 200 രൂപവരെ ഫീസ് അടയ്‌ക്കേണ്ടിവരും. ക്യാരിബാഗുകള്‍, പാക്കിംങ് കവറുകള്‍ തുടങ്ങിയവയ്ക്ക് നൂറ് ഗ്രാമിന് 10 മുതല്‍ 20 രൂപവരെ ഈടാക്കും. മറ്റു പ്ലാസ്റ്റിക് മാലിന്യങ്ങള്‍ ഓരോ 100 ഗ്രാമിനും 2 മുതല്‍ 10 രൂപവരെ ഈടാക്കുമെന്നും നിയമാവലിയില്‍ പറയുന്നു.
200 ല്‍ കൂടുതല്‍ ആളുകള്‍ പങ്കെടുക്കുന്ന ചടങ്ങുകള്‍ സംഘടിപ്പിക്കുന്നവര്‍ 250 രൂപ മാലിന്യം നീക്കാന്‍ തദ്ദേശ സ്ഥാപനങ്ങള്‍ക്ക് നല്‍കേണ്ടിവരും.