തിരുവനന്തപുരം: തെരഞ്ഞെടുപ്പ് ചുമതലയുണ്ടായിരുന്ന പൊലിസ് ഉദ്യോഗസ്ഥരുടെ പോസ്റ്റല്‍ വോട്ടില്‍ തിരിമറി നടന്നുവെന്ന ആരോപണത്തില്‍ ഇന്റലിജന്‍സ് അന്വേഷണം അവസാനഘട്ടത്തില്‍. ഇന്റലിജന്‍സ് മേധാവി ടി.കെ വിനോദ് കുമാര്‍ നാളെ പൊലിസ് മേധാവിക്ക് റിപ്പോര്‍ട്ട് സമര്‍പ്പിച്ചേക്കും.
സംശയനിഴലിലുള്ള പൊലിസ് അസോസിയേഷന്‍ നേതാക്കളെയും പോസ്റ്റല്‍ വോട്ടുകള്‍ ക്രോഡീകരിക്കുന്നതിന് ചുമതലപ്പെടുത്തിയിരുന്ന അഡിഷണല്‍ എസ്.പി റാങ്കിലുള്ള ഉദ്യോഗസ്ഥനെയും നേരില്‍ക്കണ്ടാണ് അന്വേഷണസംഘം വിവരം ശേഖരിച്ചത്.
തെരഞ്ഞെടുപ്പ് ചുമതലയുണ്ടായിരുന്ന പൊലിസ് ഉദ്യോഗസ്ഥരുടെ പോസ്റ്റല്‍ വോട്ടുകള്‍ ഇടത് അനുകൂല അസോസിയേഷന്‍ നേതാക്കള്‍ സ്വീകരിച്ചുവെന്ന വാര്‍ത്ത പുറത്തുവന്നതിനു പിന്നാലെയാണ് സംഭവം അന്വേഷിക്കാന്‍ ഡി.ജി.പി ലോക്‌നാഥ് ബെഹ്‌റ നിര്‍ദേശം നല്‍കിയത്.
55,000ത്തില്‍ അധികം പൊലിസുകാരാണ് തെരഞ്ഞെടുപ്പ് ജോലിക്ക് ഉണ്ടായിരുന്നത്. ഇവരില്‍ 90ശതമാനം പേരും പോസ്റ്റല്‍ വോട്ടാണ് ചെയ്തത്. ഒന്നിലധികം തപാല്‍ വോട്ടുകള്‍ ഒരേ മേല്‍വിലാസത്തില്‍ എത്തി എന്നതും സ്ഥലംമാറ്റമുള്‍പ്പെടെയുള്ള ഭീഷണികള്‍ മുഴക്കിയും സമ്മര്‍ദ്ദം ചെലുത്തിയുമാണ് വോട്ടുകള്‍ ശേഖരിച്ചതെന്ന ആരോപണങ്ങളും അന്വേഷണപരിധിയിലുണ്ട്.
ഇന്റലിജന്‍സ് മേധാവി നല്‍കുന്ന റിപ്പോര്‍ട്ടിന്റെ അടിസ്ഥാനത്തില്‍ മുഖ്യ തെരഞ്ഞെടുപ്പ് ഓഫിസര്‍ക്ക് ഡി.ജി.പി വിശദീകരണം നല്‍കും. പൊലിസുകാരുടെ ഭാഗത്തുനിന്ന് നിയമവിരുദ്ധമായ ഇടപെടലുകള്‍ ഉണ്ടായതായി ബോധ്യപ്പെട്ടാല്‍ കര്‍ശന നടപടി ഉണ്ടാകും.