കോഴിക്കോട്: സംസ്ഥാനത്തു പ്രളയത്തിനുശേഷം ഏറ്റവും കൂടുതല്‍ എലിപ്പനി മരണം റിപ്പോര്‍ട്ട് ചെയ്യുന്ന ജില്ലയായി കോഴിക്കോട്. ഇന്നലെ അഞ്ചുപേര്‍ കൂടി മരിച്ചതോടെ ജില്ലയില്‍ എലിപ്പനി ബാധിച്ച് മരിച്ചവരുടെ എണ്ണം 15 ആയി. ഇതോടെ ജാഗ്രത പാലിക്കാന്‍ ആരോഗ്യവകുപ്പ് നിര്‍ദേശം നല്‍കി. കന്നിപ്പാറ, പൂവാട്ട്പറമ്പ്, ഉണ്ണികുളം, കക്കോടി, അരക്കിണര്‍, കൊമ്മേരി, ചേവായൂര്‍, പന്തീരാങ്കാവ്, ചെറുവാടി, മലാപ്പറമ്പ്, പുത്തൂര്‍, കടലുണ്ടി, വാവാട്, ചാലിയം, മുതുകാട്, നടക്കാവ്, വേങ്ങേരി, കല്ലായ്, ചെറുവണ്ണൂര്‍, ചേമഞ്ചേരി, ഒടുമ്പ്ര, ഫറോക്ക് എന്നിവിടങ്ങളിലും എലിപ്പനി സ്ഥിരീകരിച്ചു. 17 പേര്‍ നിരീക്ഷണത്തിലാണ്.
നല്ലളം, മുക്കം, മാങ്കാവ്, വടകര, മൂടാടി എന്നിവിടങ്ങളിലാണ് ഇന്നലെ മരണം റിപ്പോര്‍ട്ട് ചെയ്യപ്പെട്ടത്. ഇതില്‍ വടകര മേപ്പയില്‍ പുതിയാപ്പ് ഇല്ലത്ത് മീത്തല്‍ ആണ്ടി (63) യുടെ മരണം മാത്രമാണ് ആരോഗ്യവകുപ്പ് സ്ഥിരീകരിച്ചത്. 60 ലേറെ പേര്‍ ഇപ്പോഴും എലിപ്പനി രോഗ ലക്ഷണത്തോടെ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. സ്വകാര്യ ആശുപത്രികളിലും നിരവധിപേര്‍ ചികിത്സയിലാണ്.