കല്‍പ്പറ്റ: ഊട്ടി ലൗ ഡേല്‍ ദ് ലോറന്‍സ് സ്‌കൂളില്‍ നിന്നുള്ള വിദ്യാര്‍ഥികള്‍ വൈത്തിരി പുഴയോരത്തെ 300 മീറ്റര്‍ ദൂരം വൃത്തിയാക്കി.
വയനാട് സ്‌പോര്‍ട്‌സ് ആന്‍ഡ് ഗെയിംസ് അഡ്വഞ്ചര്‍ അക്കാദമി സെക്രട്ടറി ലൂക്ക ഫ്രാന്‍സിസിന്റെ നേതൃത്വത്തിലായിരുന്നു ഏറെ ശ്രമകരമായിരുന്ന പുഴയോരത്തെ മരങ്ങളിലും മുളങ്കാടുകളിലും കുത്തൊഴുക്കില്‍ വന്നടിഞ്ഞ മാലിന്യങ്ങള്‍ ഇവര്‍ ശേഖരിച്ചത്. അക്കാദമിയുടെ നേതൃത്വത്തിലുള്ള അഞ്ചംഗ സംഘം പുഴയില്‍ വന്നടിഞ്ഞ വീട്ടുപകരണങ്ങളും പാത്രങ്ങളും മുങ്ങിയെടുത്തു. രാവിലെ എട്ടിനു തുടങ്ങിയ ശുചീകരണ യജ്ഞം ഉച്ചകഴിഞ്ഞ് മൂന്നുവരെ നീണ്ടു.
മിനിസ്ട്രി ഓഫ് ഹ്യൂമണ്‍ റിസോഴ്‌സ് ഡെവലപ്‌മെന്റിന്റെ കീഴില്‍ പ്രവര്‍ത്തിക്കുന്ന സ്‌കൂളില്‍ മിലിട്ടറി കരിക്കുലമാണ് പിന്തുടരുന്നത്. രാവിലെ ആറുമുതല്‍ ഏഴുവരെ പട്ടാള പരിശീലനമാണ് കുട്ടികള്‍ക്ക് നല്‍കുന്നത്. തുടര്‍ന്ന് രാവിലെ 8.30 മുതല്‍ 1.30 വരെ ക്ലാസും. ശേഷം ഗെയിംസ് ആക്റ്റിവിറ്റീസും. എന്‍.സി.സി ഓഫിസര്‍ ജിജോ ജോസഫിന്റെ നേതൃത്വത്തില്‍ 15 അംഗ സംഘമാണ് ഊട്ടിയില്‍ നിന്നെത്തിയത്.