തിരുവനന്തപുരം: സാധാരണ ജീവിതത്തിലേക്ക് ഇനിയും മടങ്ങിയെത്തിയിട്ടില്ലാത്ത, പ്രളയ ബാധിത മേഖലകളിലെ നൂറുകണക്കിന് വിദ്യാര്‍ഥികളെ പ്രതിസന്ധിയിലാക്കി കേരള സര്‍വ്വകലാശാല. പി.ജി വിദ്യാര്‍ഥികളുടെ പരീക്ഷ മുന്‍നിശ്ചയപ്രകാരം നടത്താന്‍ കഴിഞ്ഞ ദിവസം ചേര്‍ന്ന സിന്‍ഡിക്കേറ്റ് യോഗം തീരുമാനിച്ചു. നാളെയും ആറാം തീയതിയിലുമായി നടക്കുന്ന പരീക്ഷകള്‍ക്ക് ഹാജരാവാന്‍ കഴിയാത്ത അവസ്ഥയാണ് പ്രളയബാധിത പ്രദേശത്തെ ഭൂരിഭാഗം വിദ്യാര്‍ഥികള്‍ക്കുമുള്ളത്. സംസ്ഥാനത്തെ എല്ലാ സര്‍വ്വകലാശാലകളും പി.എസ്.സിയും ഹയര്‍ സെക്കന്‍ഡറി ഹൈസ്‌ക്കൂള്‍ പരീക്ഷകളും മാറ്റിവെയ്ക്കണമെന്ന് മുഖ്യമന്ത്രി പിണറായി വിജയന്റെ അധ്യക്ഷതയില്‍ കൂടിയ സര്‍വകക്ഷിയോഗത്തില്‍ തീരുമാനമെടുത്തിരുന്നു. ഇത് അട്ടിമറിച്ചുകൊണ്ടാണ് സര്‍വകലാശാല തീരുമാനമെടുത്തത്.
ചെങ്ങന്നൂരില്‍ തന്നെ നാല് കോളജുകള്‍ കേരള സര്‍വകലാശാലയുടെ കീഴിലാണ് ഉള്‍പ്പെട്ടിരിക്കുന്നത്. ഇവിടെ പഠിക്കുന്ന പല വിദ്യാര്‍ഥികളും ഇനിയും സാധാരണ ജീവിതത്തിലേക്കെത്തിയിട്ടില്ല. കഴിഞ്ഞ ദിവസം ചേര്‍ന്ന സിന്‍ഡിക്കേറ്റ് യോഗം ബിരുദതലം വരെയുള്ള പരീക്ഷകള്‍ മാറ്റാന്‍ തീരുമാനിച്ചെങ്കിലും പൊഫഷനല്‍ കോഴ്‌സ്, പി.ജി എന്നീ തലങ്ങളിലെ പരീക്ഷകള്‍ മുന്‍നിശ്ചയപ്രകാരം നടത്താന്‍ തീരുമാനമെടുക്കുകയായിരുന്നു. നേരത്തേ പി.ജി കോഴ്‌സുകളുടെ പരീക്ഷാ നടത്തിപ്പുമായി ബന്ധപ്പെട്ട് പി.ജി വിദ്യാര്‍ഥികള്‍ ഹൈക്കോടതിയില്‍ കേസ് നല്‍കിയിരുന്നു. പി.ജി കോഴ്‌സുകളില്‍ 90 ദിവസം അധ്യയനം നടന്നിട്ടില്ലെന്നും ആകെ ഒരു മാസം മാത്രമാണ് നടന്നിട്ടുള്ളതെന്നും അതുകൊണ്ട് പരീക്ഷ നീട്ടിവെയ്ക്കണമെന്നുമായിരുന്നു വിദ്യാര്‍ഥികളുടെ വാദം.
ആദ്യം വിദ്യാര്‍ഥികള്‍ക്ക് അനുകൂലമായ തീരുമാനം കോടതിയില്‍ നിന്നുമുണ്ടായെങ്കിലും പിന്നീട് അപ്പീലിലൂടെ സര്‍വകശാലയ്ക്ക് അനുകൂലമായി അന്തിമവിധി വന്നിരുന്നു. ഇത് നടപ്പാക്കാനുള്ള സിന്‍ഡിക്കേറ്റിലെ ചിലരുടെ വാശിയാണ് പ്രളയത്തിന് ശേഷം ധൃതി പിടിച്ചുള്ള പരീക്ഷാ നടത്തിപ്പെന്നും സര്‍വ്വകലാശാലയിലെ ചില ഉന്നത ഉദ്യോഗസ്ഥര്‍ വെളിപ്പെടുത്തുന്നു.