ന്യൂഡല്‍ഹി: അടുത്ത മാസം തായ്‌ലന്‍ഡില്‍ നടക്കുന്ന 47-ാമത് കിങ്‌സ് കപ്പ് ഫുട്‌ബോളിനുള്ള മത്സര ക്രമം തയാറായി. ഇന്നലെ തായ്‌ലന്‍ഡില്‍ നടന്ന നറുക്കെടുപ്പിലായിരുന്നു മത്സരക്രമം തയാറാക്കിയത്.
ആഫ്രിക്കന്‍ രാജ്യമായ കുറസാവോ ആയിരിക്കും കിങ്‌സ് കപ്പിലെ ഇന്ത്യയുടെ എതിരാളികള്‍. തായ്‌ലന്‍ഡിലെ ബുറിറാമില്‍ നടക്കുന്ന ടൂര്‍ണമെന്റില്‍ നാലു രാജ്യങ്ങളാണ് പങ്കെടുക്കുന്നത്. മറ്റൊരു മത്സരത്തില്‍ തായ്‌ലന്‍ഡ് വിയറ്റ്‌നാമിനെ നേരിടും. രണ്ട് മത്സരങ്ങളും ജൂണ്‍ അഞ്ചിനായിരിക്കും നടക്കുക. ഫിഫ റാങ്കിങ്ങില്‍ 82-ാം സ്ഥാനത്തുള്ള ടീമാണ് കുറസാവോ. ഏഷ്യന്‍ കപ്പിന് ശേഷം വിശ്രമത്തിലായിരുന്ന ഇന്ത്യന്‍ ടീം ആദ്യമായി കളിക്കുന്ന ടൂര്‍ണമെന്റാണിത്. നിലവില്‍ പരിശീലകനില്ലാത്ത ഇന്ത്യ ടൂര്‍ണമെന്റിന് മുന്‍പ് തന്നെ പുതിയ പരിശീലകനെ നിയമിക്കും. പരിശീലകരെ തിരഞ്ഞെടുക്കുന്നതിനായി നാലു പേരുടെ ചുരുക്കപ്പട്ടിക ഇന്ത്യ പുറത്ത് വിട്ടിരുന്നു. 114-ാം സ്ഥാനത്തുള്ള തായ്‌ലന്‍ഡ്, 98-ാം സ്ഥാനത്തുള്ള വിയറ്റ്‌നാം എന്നീ ടീമുകളാണ് ടൂര്‍ണമെന്റില്‍ പങ്കെടുക്കുന്ന മറ്റു ടീമുകള്‍.