കുട്ടനാട് : കാവാലം പഞ്ചായത്തിലെ ശുചീകരണ പ്രവര്‍ത്തനങ്ങള്‍ക്ക് കോണ്‍ഗ്രസ് പ്രവര്‍ത്തക സമിതി അംഗം ഉമ്മന്‍ ചാണ്ടി നേതൃത്വം നല്‍കി. ശുചീകരണത്തിനൊപ്പം കുടിവെള്ളമുള്‍പ്പെടെയുള്ള അടിസ്ഥാന പ്രശ്‌നക്കള്‍ക്ക് പരിഹാരം കാണാനും ഉമ്മന്‍ ചാണ്ടിയുടെ ഇടപെടലിന് കഴിഞ്ഞു.കോണ്‍ഗ്രസ് നേതാക്കളും പ്രവര്‍ത്തകരുമടക്കം വലിയ നിരയാണ് ശുചീകരണ പ്രവര്‍ത്തനങ്ങളില്‍ പങ്കാളിയായത്.
പ്രളയം വിഴുങ്ങിയ കാവാലത്ത് എ.ഐ.സി.സി. വര്‍ക്കിങ് കമ്മിറ്റി അംഗം ഉമ്മന്‍ ചാണ്ടി രാവിലെ തന്നെയെത്തി. പിന്നെ അവിടെ കാത്ത് നിന്ന് നേതാക്കളോടും പ്രവര്‍ത്തകരോടും ചെറിയ ചില കൂടിയാലോചനകള്‍. പിന്നാലെ കാവാലം ജംഗ്ഷനിലെ വ്യാപാര സ്ഥാപനങ്ങളിലേക്ക് പോയി. സര്‍ക്കാര്‍ സഹായത്തിനൊപ്പം ബാങ്ക് വായ്പ കൂടി ലഭിച്ചാലേ കച്ചവടം പഴയപടിയാക്കാന്‍ കഴിയുകയുള്ളു വെന്ന വ്യാപാരികളുടെ സങ്കടം നിറഞ്ഞ വാക്കുകള്‍ അദ്ദേഹം ശ്രദ്ധയോടെ കേട്ടു .പിന്നെ നിങ്ങളുടെ പ്രശ്‌നങ്ങളില്‍ ഇടപെടുമെന്ന ഉറപ്പും.സമീപത്തെ എല്‍.പി.സ്‌കൂളിലേക്കായിരുന്നു പിന്നീടത്തെ യാത്ര.
പ്രളയത്തില്‍ മലിനജലം നിറഞ്ഞ സ്‌കൂളിലെ കിണര്‍ വൃത്തിയാക്കുന്നതിനും തകര്‍ന്ന മേട്ടര്‍ ശരിയാക്കുന്നതിനായിരുന്നു പിന്നീടുള്ള ശ്രമം.അടുത്ത സ്ഥലത്തേക്ക് പോകുന്നതിനിടയില്‍ പരാതിയുമായി വീട്ടമ്മമാര്‍ ഉമ്മന്‍ ചാണ്ടിയെ വളഞ്ഞു. വീട്ടമ്മമാര്‍ ഉന്നയിച്ച ഏറ്റവും വലിയ പരാതി കുടിവെള്ളം കിട്ടാനില്ല എന്നതായിരുന്നു. അതിന് അപ്പോള്‍ തന്നെ താല്‍ക്കാലിക പരിഹാരം കണ്ടു.ഉടന്‍ തന്നെ വെള്ളമെത്തിച്ച് നല്‍കി. പ്രളയബാധിതര്‍ക്ക് സര്‍ക്കാര്‍ വാഗ്ദാനം ചെയ്ത പതിനായിരം രൂപ ലഭിച്ചില്ലെന്നും പലരും പരാതി പറഞ്ഞു. ഇക്കാര്യം മുഖ്യമന്ത്രിയുടെ ശ്രദ്ധപ്പെടുത്തി അടിയന്തിരമായി പരിഹാരം കാണുമെന്ന ഉറപ്പും ഉമ്മന്‍ ചാണ്ടി അവര്‍ക്ക് നല്‍കി.പഞ്ചായത്തിലെ ഉള്‍മേഖലകളിലടക്കം ഉമ്മന്‍ ചാണ്ടിയുടെ നേതൃത്വത്തിലുള്ള സംഘം എത്തി ശുചീകരണ പ്രവര്‍ത്തനങ്ങള്‍ നടത്തി.
പ്രളയം തകര്‍ത്ത വീടുകളും പ്രദേശങ്ങളുമൊക്കെ താണ്ടി പിന്നെയും യാത്ര തുടര്‍ന്നു. ഇതിനിടയില്‍ മുന്നിലെത്തിയ പരാതികള്‍ മിക്കതും ടെലഫോണിലൂടെയും ഒപ്പമുള്ള നേതാക്കള്‍ക്ക് നിര്‍ദേശം നല്‍കിയും അപ്പോള്‍ തന്നെ പരിഹാരം കണ്ടു. മഹാദുരന്തത്തിന്റെ നടുക്കത്തില്‍ നിന്നും ഇപ്പോഴും മുക്തി നേടാത്ത കാവാലത്തെ ജനങ്ങള്‍ക്ക് വലിയ ആശ്വാസം പകര്‍ന്ന് കൊണ്ടാണ് ഉമ്മന്‍ ചാണ്ടിയും കൂട്ടരും മടങ്ങിയത്.