തൊടുപുഴ: പണത്തെ ചൊല്ലിയുള്ള തര്‍ക്കത്തെ തുടര്‍ന്ന് അമ്മയെ ഷോക്കടിപ്പിച്ച് കൊല്ലാന്‍ ശ്രമിച്ച മകന്‍ അറസ്റ്റില്‍. കുമളി ചെങ്കര പൊതുവല്‍ സ്വദേശി രാജേന്ദ്രന്‍ (49) ആണ് പിടിയിലായത്. ചെങ്കര എസ്‌റ്റേറ്റിലെ പരേതനായ അന്തോണി മുത്തുവിന്റെ ഭാര്യ മരിയ സെല്‍വം (71) നല്‍കിയ പരാതിയിലാണ് അറസ്റ്റ്.
വീടിന്റെ താഴില്‍ മെയിന്‍ സ്വിച്ചില്‍ നിന്ന് വയര്‍ വലിച്ച് വൈദ്യുതിയുമായി ബന്ധിപ്പിക്കുകയായിരുന്നു. പുറത്തുപോയിട്ടെത്തിയ മരിയ വാതില്‍ തുറക്കാനായി ശ്രമിച്ചപ്പോള്‍ ഷോക്കടിച്ച് തെറിച്ച് വീഴുകയായിരുന്നു. വിവാഹം കഴിച്ച് മാറി താമസിക്കുന്ന രാജേന്ദ്രന്‍ തനിച്ച് കഴിയുന്ന മാതാവ് മരിയയെ നിരന്തരം പണത്തിനായി ശല്യപ്പെടുത്തിയിരുന്നു. എസ്റ്റേറ്റില്‍ നിന്ന് പെന്‍ഷനായി ഇവര്‍ക്ക് ലഭിക്കുന്ന പണമാണ് ആവശ്യപ്പെട്ടിരുന്നത്. കഴിഞ്ഞ ദിവസം വീട്ടിലെത്തിയ രാജേന്ദ്രനോട് മരിയ ഇറങ്ങിപ്പോകാന്‍ ആവശ്യപ്പെട്ടിരുന്നു. ഇതിന്റെ വൈരാഗ്യത്തിലാണ് ഷോക്കടിപ്പിച്ച് കൊല്ലാന്‍ ശ്രമം നടത്തിയതെന്ന് പൊലിസ് പറഞ്ഞു. സംഭവത്തില്‍ ഐ.പി.സി 307 വകുപ്പ് പ്രകാരം കൊലപാതക ശ്രമത്തിനാണ് കേസെടുത്തത്. പ്രതിയെ വിശദമായ ചോദ്യം ചെയ്യലിന് ശേഷം ഇന്ന് കോടതിയില്‍ ഹാജരാക്കും.