മൊഹാലി: വനിതാ ടി20 ചലഞ്ച് ചാംപ്യന്‍ഷിപ്പില്‍ ഹര്‍മന്‍പ്രീത് കൗര്‍ നയിച്ച സൂപ്പര്‍ നോവാസിന് കിരീടം. ആവേശകരമായ അന്ത്യത്തിലേക്ക് നീങ്ങിയ ഫൈനലില്‍ മിതാലി രാജ് നയിച്ച വെലോസിറ്റിയേയാണ് സൂപ്പര്‍ നോവാസ് പരാജയപ്പെടുത്തിയത്. നാല് വിക്കറ്റിനാണ് സൂപ്പര്‍ നോവാസിന്റെ ജയം. ആദ്യം ബാറ്റ് ചെയ്ത വെലോസിറ്റി ആറ് വിക്കറ്റ് നഷ്ടത്തില്‍ 121 റണ്‍സെടുത്തു. സുഷ്മ വെര്‍മയുടെ (40) മികച്ച ബാറ്റിങ്ങിന്റെ കരുത്തിലായിരുന്നു വെലോസിറ്റി 121 റണ്‍സെടുത്തത്. അമേലിയ കെര്‍ 36 റണ്‍സും സ്‌കോര്‍ബോര്‍ഡില്‍ കൂട്ടിച്ചേര്‍ത്തു. വെലോസിറ്റിയുടെ നാല് താരങ്ങള്‍ രണ്ടക്കം കാണാതെ പുറത്തായി.
മറുപടി ബാറ്റിങ്ങിനിറങ്ങിയ സൂപ്പര്‍ നോവാസിന് തുടക്കത്തില്‍ തിരിച്ചടി നേരിട്ടു. സ്‌കോര്‍ ബോര്‍ഡില്‍ 9 റണ്‍സ് ചേര്‍ക്കുന്നതിനിടെ ആദ്യ വിക്കറ്റ് നഷ്ടമായി. രണ്ട് റണ്‍സുമായി ചമരി അത്തപ്പത്തുവാണ് പവലിയനിലേക്ക് മടങ്ങിയത്. പിന്നീടെത്തിയ ജെമീമ റോഡ്രിഗ്രസ് 25 പന്തില്‍ നിന്ന് 22 റണ്‍സെടുത്ത് ടീമിന് മികച്ച സംഭാവന നല്‍കി. റോഡ്രിഗ്രസിന് ശേഷമാണ് നായക ഹര്‍മന്‍ പ്രീത് കൗര്‍ എത്തിയത്. 37 പന്തില്‍ നിന്ന് 51 റണ്‍സ് സ്വന്തമാക്കിയ ഹര്‍മന്‍പ്രീത് ടീമിനെ വിജയത്തിനോടടുത്തെത്തിച്ച് പുറത്തായി. കൗറിന്റെ വിക്കറ്റ് വീണതോടെ ജയിക്കുമെന്ന് തോന്നിച്ചിരുന്ന മത്സരം സമ്മര്‍ദത്തിലായി. പിന്നീട് ക്രീസിലെത്തിയ രാധാ യാദവ് ടീമിനെ അനായാസം വിജയത്തിലെത്തിക്കുകയായിരുന്നു. അവസാന പന്തില്‍ ഒരു റണ്‍സ് ജയിക്കാന്‍ വേണ്ടിയിരുന്ന മത്സരത്തില്‍ ബൗണ്ടറി നേടിയാണ് രാധ ടീമിനെ ചാംപ്യന്മാരാക്കിയത്. ഹര്‍മന്‍ പ്രീതിന്റെ മികച്ച ഇന്നിങ്‌സാണ് തോല്‍വിയിലേക്ക് പോവുകയായിരുന്ന സൂപ്പര്‍ നോവയെ വിജയത്തിലെത്തിച്ചത്.