പൊന്നാനി: പുതുപൊന്നാനി എം.ഐ ഗേള്‍സ് ഹയര്‍ സെക്കന്‍ഡറി സ്‌കൂളിലെ അഞ്ചാം ക്ലാസ് വിദ്യാര്‍ഥിനിയായ ഫാത്തിമ സന്‍ഹയ്ക്ക് ഇനി സ്വര്‍ണ വളയണിയാം. വള വാങ്ങാന്‍ സ്വരൂപിച്ച തുകയെല്ലാം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കാനായി പ്രധാനാധ്യാപകനെ ഏല്‍പ്പിച്ചതറിഞ്ഞ ചന്തപ്പടിയിലെ സോന പാലസ് ജ്വല്ലറിയാണ് ഫാത്തിമക്ക് സമ്മാനമായി സ്വര്‍ണവള നല്‍കാന്‍ തീരുമാനിച്ചത്.
വിഷയം സ്‌കൂള്‍ അധികൃതരെ അറിയിക്കുകയും ബുധനാഴ്ച സ്‌കൂളില്‍ നടക്കുന്ന ചടങ്ങില്‍ സ്വര്‍ണം സമ്മാനിക്കാമെന്ന് പ്രിന്‍സിപ്പല്‍ അറിയിക്കുകയും ചെയ്തതായി ജ്വല്ലറിയുടമ ബഷീര്‍ പറഞ്ഞു. പുതുപൊന്നാനി ജീലാനി നഗറില്‍ ഇല്‍യാസിന്റെയും സുബീനയുടെയും മകളാണ് ഫാത്തിമ സന്‍ഹ.