ചങ്ങരംകുളം: പ്രളയംമൂലം വെള്ളം കയറിയ വീട്ടിലെ ആടുകള്‍ കൂട്ടത്തോടെ ചത്തു. ആലംകോട് ഗ്രാമപഞ്ചായത്തിലെ പന്താവൂര്‍ മനക്കടവത്ത് കൊലവന്റെ വളപ്പില്‍ മൊയ്തുണ്ണിയുടെ വീട്ടിലാണ് ആടുകള്‍ കൂട്ടത്തോടെ ചത്തത്. കഴിഞ്ഞ പ്രളയത്തില്‍ വെള്ളം കയറി താമസം മാറ്റിയിരുന്ന കുടുംബം തിരിച്ചുവന്നതിനു ശേഷമാണ് 26 ആടുകളുമായി ഉപജീവന മാര്‍ഗം നടത്തിയിരുന്ന മൊയ്തുണ്ണിയുടെ ആടുകള്‍ അടുത്ത ദിവസങ്ങളിലായി ചത്തു തുടങ്ങിയത്. പനിയും വയറിളക്കവും താട വീക്കവും ഉണ്ടായാണ് 12 ആടുകളും ഓരോ ദിവസങ്ങളായി ചത്തുവീണത്. മറ്റു ആടുകള്‍ക്കും രോഗബാധയുടെ ലക്ഷണങ്ങള്‍ കണ്ടുതുടങ്ങിയതിനെ തുടര്‍ന്ന് അധികൃതര്‍ പ്രദേശത്ത് പരിശോധന നടത്തി. സാഹചര്യങ്ങള്‍ വിലയിരുത്തി വേണ്ട മുന്‍ കരുതലുകള്‍ക്ക് നിര്‍ദേശം നല്‍കിയിട്ടുണ്ട്.