ജിദ്ദ: അടുത്ത മാസം നാല് മുതല്‍ പുനരാരംഭിക്കുന്ന ഉംറ തീര്‍ഥാടനവും മദീന സിയാറയും സുഗമമാക്കാന്‍ സഊദി ഹജ്ജ് ഉംറ മന്ത്രാലയം പുറത്തിറക്കിയ 'ഇഅ്തമര്‍നാ'മൊബൈല്‍ ആപ്ലിക്കേഷന്‍ വഴി ബുക്ക് ചെയ്ത് ഉംറ നിര്‍വഹിക്കാനുള്ള അവസരം ആദ്യ മണിക്കൂറുകളില്‍ തന്നെ ആയിരക്കണക്കിനു വിശ്വാസികള്‍ ഉപയോഗപ്പെടുത്തി.

ഉംറ നിര്‍വഹിക്കുന്നതിനുള്ള ആദ്യ പത്ത് ദിവസത്തേക്കുള്ള ബുക്കിങ് ഇതിനകം പൂര്‍ത്തിയായതായി സഊദി ഹജ്ജ്  ഉംറ മന്ത്രി അറിയിച്ചു. തവക്കല്‍നാ ആപ് വഴി പെര്‍മിറ്റ് ലഭിക്കുന്നതോടെ പ്രത്യേകം നിശ്ചയിച്ച സമയത്ത് തീര്‍ഥാടകര്‍ക്ക് ഹറമില്‍ പ്രവേശിക്കാന്‍ സാധിക്കും. ഓരോ ഗ്രൂപ്പ് ഉംറ തീര്‍ഥാടകര്‍ക്കുമൊപ്പം ആരോഗ്യ പ്രവര്‍ത്തകരനായ ഒരു ലീഡറുണ്ടാകും. ഹെല്‍ത്ത് ലീഡര്‍ തീര്‍ഥാടകരെ ഹറമില്‍ അനുഗമിക്കും. സുരക്ഷിതമായി ഉംറ കര്‍മം നിര്‍വഹിക്കുന്നതില്‍ ആവശ്യമായ ആരോഗ്യ മാര്‍ഗനിര്‍ദേശങ്ങളും ബോധവല്‍ക്കരണങ്ങളും ഹെല്‍ത്ത് ലീഡര്‍ നല്‍കും. കൂടാതെ തീര്‍ഥാടകര്‍ തമ്മില്‍ സുരക്ഷിത അകലം പാലിക്കുന്നതും ഹെല്‍ത്ത് ലീഡര്‍ ഉറപ്പു വരുത്തുമെന്നും ഡെപ്യൂട്ടി ഹജ്, ഉംറ മന്ത്രി പറഞ്ഞു.