ഗൂഡല്ലൂര്‍: കാട്ടാനയുടെ ആക്രമണത്തില്‍ ആദിവാസി വയോധികന് ഗുരുതര പരുക്ക്. മസിനഗുഡി ആദിവാസി കോളനിയിലെ സിദ്ധന്‍ (68) ആണ് പരുക്കേറ്റത്. ഇന്നലെ രാവിലെ ഒന്‍പതോടെയാണ് സംഭവം.
മസിനഗുഡി വനത്തില്‍ വിറക് ശേഖരിക്കാന്‍ പോയ ഇയാളും ഭാര്യ മാരിയും കാട്ടാനയുടെ മുന്നില്‍ പെടുകയായിരുന്നു. കാട്ടാന സിദ്ധനെ തുമ്പികൈയില്‍ പിടികൂടി എടുത്തെറിഞ്ഞു. കൂടെയുണ്ടായിരുന്ന ഭാര്യ മാരി ഓടി രക്ഷപ്പെടുകയായിരുന്നു.
മാരി അറിയിച്ചതിനെ തുടര്‍ന്നെത്തിയ നാട്ടുകാരാണ് പിന്നീട് ഇയാളെ ആശുപത്രിയിലെത്തിച്ചത്. ഗുരുതര പരുക്കേറ്റ ഇയാളെ ഗൂഡല്ലൂര്‍ താലൂക്ക് ആശുപത്രിയിലും തുടര്‍ന്ന് ഊട്ടി ജില്ലാ ആശുപത്രിയിലും പ്രവേശിപ്പിച്ചു.