മാഡ്രിസ്: സ്പാനിഷ് ലീഗ് ഫുട്‌ബോളില്‍ വീണ്ടും ബാഴ്‌സത്തിളക്കം. മെസി, സുവാരസ്, നെയ്മര്‍ കൂട്ടുകെട്ടില്‍ വില്ലാറയിലിനെ ഒന്നിനെതിരെ നാലു ഗോളുകള്‍ക്ക് തകര്‍ത്താണ് ബാഴസലോണ കിരീട പ്രതീക്ഷ നിലനിര്‍ത്തിയത്.

സസ്‌പെന്‍ഷന് ശേഷം രണ്ടാം മത്സരത്തിനിറങ്ങിയ നെയ്മര്‍ തകര്‍പ്പന്‍ ഫോം തുടര്‍ന്നതോടെ ഇരുപത്തൊന്നാം മിനുറ്റില്‍ കളിയിലെ ആദ്യ ഗോള്‍ പിറന്നു. ബോക്‌സില്‍ അഞ്ച് പ്രതിരോധക്കാരെ മറികടന്നാണ് മെസിയും നെയ്മറും ചേര്‍ന്ന് ഗോള്‍വേട്ടക്ക് തുടക്കമിട്ടത്. അറുപത്തി ഒമ്പതാം മിനുറ്റിലാണ് സുവാരസ് മത്സരത്തിലെ തന്റെ ഗോള്‍ നേടിയത്. രണ്ട് മത്സരങ്ങളില്‍ സുവാരസിന്റെ മൂന്നാം ഗോളാണിത്. സീസണില്‍ മെസി നെയ്മര്‍ സുവാരസ് സഖ്യത്തിന്റെ നൂറാം ഗോളാണിത്.

അതേസമയം, ഗ്രാനഡയെ ഏകപക്ഷീയമായ നാല് ഗോളുകള്‍ക്ക് കീഴടക്കി കിരീടത്തോട് തൊട്ടു നില്‍ക്കുകയാണ് റയല്‍ മാഡ്രിസ്. ബാഴ്‌സക്കും റയലിനും ഇപ്പോള്‍ 84 പോയന്റ് വീതമാണുള്ളത്. എന്നാല്‍ ഒരു മത്സരം കുറവാണ് കളിച്ചതെന്നത് റയലിന് മുന്‍തൂക്കം നല്‍കുന്നു.