കൊച്ചി: രാജ്യത്തെ മെഡിക്കല്‍ വിദ്യാഭ്യാസ സഥാപനങ്ങളിലേക്കുള്ള എന്‍ട്രന്‍സ് പരീക്ഷയായ നീറ്റ് എഴുതാനെത്തിയ വിദ്യാര്‍ത്ഥികളുടെ അടിവസ്ത്രം വരെ അഴിച്ച് പരിശോധന നടത്തിയ സംഭവത്തില്‍ ഉന്നതതല അന്വേഷണം നടത്തി ശക്തമായ നടപടി സ്വീകരിക്കണമെന്ന് കേരള മഹിളാസംഘം സംസ്ഥാന പ്രസിഡന്റ് കമലാസദാനന്ദനും സെക്രട്ടറി അഡ്വ. പി വസന്തവും കേന്ദ്രസംസ്ഥാന സര്‍ക്കാരുകളോട് അവശ്യപ്പെട്ടു. പരീക്ഷാ നിബന്ധനകളുടെ പേരില്‍ സ്ത്രീകളെ അവഹേളിച്ച ഉദ്യോഗസ്ഥരുടെ നടപടി കേരളത്തിന് അപമാനമാണ്. കടുത്ത മനുഷ്യാവകാശ ലംഘനമാണെന്ന് സംഭവിച്ചതെന്നും അടുത്ത വര്‍ഷം മുതല്‍ ഇത്തരം സംഭവങ്ങള്‍ ഉണ്ടാകാതിരിക്കാന്‍ അധികൃതരുടെ ഭാഗത്തു നിന്നും കര്‍ശന നടപടിയുണ്ടാകണമെന്നും മഹിളാസംഘം ആവശ്യപ്പെട്ടു. സംഭവത്തില്‍ മഹിളാസംഘം ശക്തമായ പ്രതിഷേധം രേഖപ്പെടുത്തി. പരീക്ഷാ നിബന്ധനകളുടെ പേരില്‍ പെണ്‍കുട്ടികളുടെ അടിവസ്ത്രം ഉള്‍പ്പെടെ അഴിപ്പിച്ച് അവഹേളിച്ചതില്‍ സംസ്ഥാന മനുഷ്യാവകാശ കമ്മീഷനും കേസെടുത്തിട്ടുണ്ട്.
കഴിഞ്ഞ ദിവസം കണ്ണൂരിലാണ് സംസ്ഥാനത്തിനൊട്ടാകെ അപമാനകരമായ സംഭവം നടന്നത്. പരീക്ഷാ ഹാളിലേക്കു കയറുംമുമ്പ് ഡ്രസ് കോഡിന്റെ പേരിലാണ് ഈ അപമാനം അരങ്ങേറിയതെന്നാണ് ആരോപണം. സുരക്ഷാ സംവിധാനങ്ങളുടെ ഭാഗമായുള്ള നടപടി എന്ന ന്യായീകരണത്തോടെയായിരുന്നു പരിശോധന. ഇതോടൊപ്പം മറ്റു പല പരീക്ഷാ കേന്ദ്രങ്ങളിലും സമാനമായ സംഭവങ്ങള്‍ അരങ്ങേറിയിരുന്നു.