തിരുവനന്തപുരം: ലൈഫ് മിഷന്‍ ക്രമക്കേടില്‍ സിബിഐ അന്വേഷണം കോടതി സ്റ്റേ ചെയ്ത നടപടി സര്‍ക്കാരിന്റെ വിജയമല്ലെന്ന് അനില്‍ അക്കര എംഎല്‍എ. സിബിഐ സമര്‍പ്പിച്ച എഫ് ഐ ആര്‍ റദ്ദാക്കിയിട്ടില്ല. ലൈഫ് മിഷനെ പ്രതിയാക്കുന്നതില്‍ രണ്ടു മാസത്തേക്ക് സ്റ്റേ അനുവദിക്കുക മാത്രമാണ് ചെയ്തത്. അഴിമതി എങ്ങനെ നടന്നു എന്നതിനെ കുറിച്ചുള്ള വിവരങ്ങളെല്ലാം ഇതിനകം പുറത്ത് വന്നിട്ടുണ്ട്. അന്വേഷണം നടക്കുമ്പോള്‍ അതെല്ലാം തെളിയുമെന്ന് അദ്ദേഹം പറഞ്ഞു.

പ്രതീക്ഷിച്ച വിധിയാണ് വന്നത്. താന്‍ നല്‍കിയ തെളിവുകള്‍ കോടതിക്ക് ബോധ്യപ്പെട്ടു. വിദേശ സഹായ നിയന്ത്രണ നിമയ ചട്ടത്തിന്റെ ലംഘനം ഉണ്ടോ എന്ന കാര്യത്തില്‍ മാത്രമാണ് അവ്യക്തത. അഴിമതി ആരോപണത്തില്‍ നിന്ന് സര്‍ക്കാര്‍ മുക്തമായിട്ടില്ല. നിയമ പോരാട്ടം തുടരുമെന്നും അനില്‍ അക്കര എംഎല്‍എ തൃശൂരില്‍ പറഞ്ഞു.