വാര്‍സോ: പോളണ്ടില്‍ നടക്കുന്ന അണ്ടര്‍ 20 ലോകകപ്പില്‍ അര്‍ജന്റീന, ഫ്രാന്‍സ്, ജപ്പാന്‍ എന്നീ ടീമുകള്‍ക്ക് ജയം. അര്‍ജന്റീന ദക്ഷിണാഫ്രിക്കയെ 5-2ന് പരാജയപ്പെടുത്തിയപ്പോള്‍ ഫ്രാന്‍സ് എതിരില്ലാത്ത രണ്ട് ഗോളുകള്‍ക്ക് സഊദി അറേബ്യയെ തകര്‍ത്തു. മറ്റൊരു മത്സരത്തില്‍ ജപ്പാന്‍ മെക്‌സിക്കോയെ 3-0ത്തിന് പരാജയപ്പെടുത്തി ഗ്രൂപ്പ് ബിയില്‍ ഒന്നാമതെത്തി. രണ്ട് മത്സരങ്ങളില്‍നിന്ന് ഒരു ജയവും ഒരു സമനിലയുമടക്കം നാല് പോയിന്റാണ് ജപ്പാനുള്ളത്. നാലാം മിനുട്ടില്‍തന്നെ ഫാസ്റ്റോ വെറയിലൂടെ ലീഡെടുത്ത അര്‍ജന്റീനയെ 23ാം മിനുട്ടില്‍ കീനന്‍ ഫിലിപ്‌സിന്റെ ഗോളില്‍ ദക്ഷിണാഫ്രിക്ക ഒപ്പം പിടിച്ചിരുന്നു. 61, 71 മിനുട്ടുകളില്‍ ബാര്‍കോയുടെ ഗോളില്‍ ലീഡെടുത്ത അര്‍ജന്റീന 78ാം മിനുട്ടില്‍ ജൂലിയന്‍ അല്‍വാരെസിലൂടെ ഗോള്‍ നേട്ടം നാലാക്കി ഉയര്‍ത്തി. 85ാം മിനുട്ടില്‍ ലഭിച്ച പെനാല്‍റ്റിയിലൂടെ ഫോസ്റ്റര്‍ ദക്ഷിണാഫ്രിക്കക്ക് രണ്ടാം ഗോള്‍ നേടിക്കൊടുത്തെങ്കിലും അര്‍ജന്റീനയെ മറികടക്കാന്‍ അത് മതിയായിരുന്നില്ല. 66ാം മിനുട്ടില്‍ കീനന്‍ ഫിലിപ്‌സ് ചുവപ്പ് കാര്‍ഡ് കണ്ട് പുറത്ത് പോയതിനാല്‍ 10 പേരുമായാണ് ദക്ഷിണാഫ്രിക്ക മത്സരം പൂര്‍ത്തിയാക്കിയത്. മത്സരം അവസാനിക്കാന്‍ സെക്കന്‍ഡുകള്‍ ബാക്കി നില്‍ക്കെ അഡോള്‍ഫോ ഗൈച്ച് അര്‍ജന്റീനയുടെ അഞ്ചാം ഗോളും നേടി.