പൊന്നാനി: സ്പീക്കറെ അഭിനന്ദിച്ച് ഫേസ്ബുക്കില്‍ സ്പീക്കറുടെ തന്നെ കമന്റെ്. പൊന്നാനിയില്‍ വരാന്‍ പോകുന്ന കടല്‍പാലത്തെക്കുറിച്ചുള്ള സ്പീക്കര്‍ പി. ശ്രീരാമകൃഷ്ണന്റെ പോസ്റ്റിലാണ് സ്പീക്കറുടെ തന്നെ അഭിനന്ദന കമന്റെും പ്രത്യക്ഷപ്പെട്ടത്. സംഭവം സോഷ്യല്‍ മീഡിയയില്‍ ട്രോളുകള്‍ക്ക് ഇടയാക്കിയതോടെ തന്റെ ഫേസ്ബുക്ക് അക്കൗണ്ട് ഹാക്ക് ചെയ്‌തെന്ന പരാതിയുമായി സ്പീക്കര്‍ പി. ശ്രീരാമകൃഷ്ണന്‍ തന്നെ രംഗത്തെത്തി.

 പൊന്നാനിയില്‍ ഹൗറ മോഡല്‍ ഹാങ്ങിങ് ബ്രിഡ്ജിന് കിഫ്ബി അംഗീകാരം ലഭിച്ചത് സംബന്ധിച്ച് ശ്രീരാമകൃഷ്ണന്‍ പോസ്റ്റ് ചെയ്ത ഫേസ്ബുക്ക് കുറിപ്പിന് താഴെയാണ് അഭിനന്ദിച്ച് അദ്ദേഹത്തിന്റെ തന്നെ കമന്റെ് പ്രത്യക്ഷപ്പെട്ടത്. ഇതിന് പിന്നാലെയാണ് തന്റെ ഫേസ്ബുക്ക് അക്കൗണ്ട് ഹാക്ക് ചെയ്യപ്പെട്ടെന്ന് സ്പീക്കര്‍ വ്യക്തമാക്കിയത്.

സ്പീക്കറുടെ വിശദീകരണം ഇങ്ങനെ 'പൊന്നാനിയില്‍ നിര്‍മാണാനുമതി ലഭിച്ചു ടെന്‍ഡര്‍ നടപടികളിലേക്ക് പോകുന്ന  അഴിമുഖത്തിന് കുറുകെയുള്ള ഹാങ്ങിങ് ബ്രിഡ്ജ് സംബന്ധിച്ചു ഇന്നലെ എന്റെ ഫേസ്ബുക്ക് പോസ്റ്റില്‍ എന്നെ അഭിനന്ദിച്ചു കൊണ്ട് ഞാന്‍ തന്നെ കമന്റെ് ചെയ്തതായി കാണുകയുണ്ടായി. മിനിട്ടുകള്‍ കൊണ്ട് ആ കമന്റെില്‍ നിരവധി റിയാക്ഷനുകളും റിപ്ലേ കമന്റെുകളും വരികയും സ്‌ക്രീന്‍ ഷോട്ട് വ്യാപകമായി പ്രചരിപ്പിക്കുകയും ചെയ്തതായി കണ്ടു. 

അക്കൗണ്ട് ഹാക്ക് ചെയ്തു കയറി കൊച്ചിയില്‍ നിന്നും കമന്റെിട്ടതായി കണ്ടെത്തിയിട്ടുണ്ട്. ഇക്കാര്യത്തില്‍ തെളിവ് സഹിതം പൊലിസില്‍ പരാതി നല്‍കാന്‍ തീരുമാനിച്ചിട്ടുണ്ട്. ഹാക്ക് ചെയ്തവരുടെ കുബുദ്ധിയല്ലാതെ ഇതില്‍ മറ്റൊന്നുമില്ലെന്നു എല്ലാ സുഹൃത്തുക്കളെയും അറിയിക്കുന്നു'

ഫേസ്ബുക്ക് പേജ് രാത്രി ഹാക്ക് ചെയ്യപ്പെട്ട സംഭവത്തില്‍  അന്വേഷണം ആവശ്യപ്പെട്ട് ആഭ്യന്തരവകുപ്പ് അഡീഷണല്‍ ചീഫ് സെക്രട്ടറിക്കും ഡി.ജി.പിക്കും സ്പീക്കര്‍ പരാതി നല്‍കിയിട്ടുണ്ട്. അതേസമയം ഫേസ്ബുക്ക് പേജ് കൈകാര്യം ചെയ്യുന്ന അഡ്മിനിന് അബദ്ധം പറ്റിയാലും ഇങ്ങനെ സംഭവിക്കാന്‍ സാധ്യതയുണ്ട്.