മണ്ണുത്തി: തൃശൂര്‍ ഉപജില്ലയിലെ പ്രധാനാധ്യാപകര്‍ക്കു വേണ്ടി കാര്‍ഷിക സര്‍വകലാശാല സംഘടിപ്പിച്ച ഹരിത കേരളവും ജൈവ പാര്‍ക്കും ശില്‍പശാല വിജ്ഞാന വ്യാപന ഡയറക്ടര്‍ ഡോ. എസ്.എസ്റ്റലീറ്റ ഉദ്ഘാടനം ചെയ്തു. കേരളത്തിന്റെ മണ്ണും ജലവും വായുവും മലിന രഹിതമാക്കി കാത്തു സൂക്ഷിക്കേണ്ടതിന്റെ അനിവാര്യത തിരിച്ചറിഞ്ഞ് ഹരിതകേരളം പദ്ധതിയുടെ കാര്യക്ഷമമായ നിര്‍വഹണത്തില്‍ ഭാഗഭാക്കാകാന്‍ വിദ്യാര്‍ഥികളെ പ്രേരിപ്പിക്കേണ്ടത് അധ്യാപകരാണെന്ന് ഡോ. എസ്റ്റലീറ്റ പറഞ്ഞു. മരങ്ങളെ സ്‌നേഹിച്ചാല്‍ മറ്റെന്തിനേയും സ്‌നേഹിക്കുന്ന ശീലം തനിയേ ഉണ്ടാവും. മരം വരമാണെന്ന സത്യം മാനുഷ്യന്‍ മറന്നതാണ് ആഗോള താപനത്തിനം കാലാവസ്ഥാ വ്യതിയാനത്തിനും ഒക്കെ വഴി തെളിച്ചത്. നമുക്കു വേണ്ട ആഹാരം നാം തന്നെ ഉല്‍പാദിപ്പിക്കണമെന്ന പൂര്‍വികരുടെ ഉപദേശം തള്ളിക്കളഞ്ഞ കേരളം ഇന്ന് വേണ്ടതെല്ലാം പുറമെ നിന്നു വാങ്ങി മാലിന്യം മാത്രം ഉല്‍പ്പാദിപിക്കുന്നു. കുട്ടികളുടെ ബോധവല്‍കരണത്തിലൂടെയേ നല്ല ശീലങ്ങള്‍ തിരിച്ചു കൊണ്ടു വരാന്‍ കഴിയൂ എന്നും അതിന് സ്‌കൂള്‍ കോമ്പൗണ്ടുകള്‍ പരിസ്ഥിതി സൗഹൃദമാവണമെന്നും കണ്ടാണ് ജൈവ പാര്‍ക്കുകള്‍ പ്രചരിപ്പിക്കുന്നതെന്നും ഡോ.എസ്റ്റലീറ്റ പറഞ്ഞു. സ്‌കൂളുകളില്‍ നടാനുള്ള ഫലവൃക്ഷത്തൈകളൂടെ വിതരണവും  ശില്‍പശാലയോടൊപ്പം നടന്നു. തൃശൂര്‍ ജില്ലാ വിദ്യാഭ്യാസ ഓഫിസര്‍ ഇ.നാരായണി അധ്യക്ഷയായിരുന്നു. ഹെഡ്മാസ്റ്റേഴ്‌സ് ഫോറം കണ്‍വീനര്‍ ജോസഫ് മാസ്റ്റര്‍ സ്വാഗതവും കാര്‍ഷിക സര്‍വകലാശാലാ സ്‌കൂള്‍ ഹെഡ്മിസ്ട്രസ് ടി.ജെ മാഗി നന്ദിയും പറഞ്ഞു.