ന്യൂഡല്‍ഹി: റിയോ ഒളിംപിക്‌സിലെ ഇന്ത്യയുടെ മെഡല്‍ പ്രതീക്ഷയായിരുന്ന ഗുസ്തി താരം നര്‍സിങ് യാദവ് ഉത്തേജക മരുന്നു പരിശോധനയില്‍ പരാജയപ്പെട്ടു. റിയോയില്‍ 74 കിലോ വിഭാഗം ഗുസ്തിയില്‍ ഇന്ത്യയെ പ്രതിനിധീകരിക്കുന്നത് നര്‍സിങായിരുന്നു. ഇതോടെ നര്‍സിങിന്റെ ഒളിംപിക്‌സ് പങ്കാളിത്തവും അനിശ്ചിതത്വത്തിലായി. ദേശീയ ഉത്തേജക വിരുദ്ധ ഏജന്‍സി (നാഡ) സോനപേട്ടിലെ സായി കേന്ദ്രത്തില്‍ ഇക്കഴിഞ്ഞ അഞ്ചിനു നടത്തിയ ഉത്തേജക പരിശോധനയിലാണ് നര്‍സിങ് പരാജയപ്പെട്ടത്. യാദവിന്റെ എ സാംപിളും ബി സാംപിളും പരിശോധിച്ചപ്പോള്‍ രണ്ടും പോസിറ്റീവായിരുന്നു. നര്‍സിങ് ഉത്തേജക പരിശോധനയില്‍ പരാജയപ്പെട്ടതായി റസ്ലിങ് ഫെഡറേഷന്‍ ഓഫ് ഇന്ത്യ സ്ഥിരീകരിച്ചിട്ടുണ്ട്. നര്‍സിങ് ഹാജരാക്കിയ എ സാംപിള്‍ ഫലം പോസിറ്റീവായതിനെ തുടര്‍ന്നു ബി സാംപിളും പരിശോധനയ്ക്കു സമര്‍പ്പിക്കുകയായിരുന്നു. ഇതും പോസിറ്റീവായിരുന്നുവെന്നു നാഡ ഡയറക്ടര്‍ ജനറല്‍ നവീന്‍ അഗര്‍വാള്‍ വ്യക്തമാക്കി.
എന്നാല്‍ ഭക്ഷണത്തില്‍ മയക്കുമരുന്ന് കലര്‍ത്തി തന്നെ കുടുക്കിയതാണെന്ന് നര്‍സിങ് പ്രതികരിച്ചു.
നര്‍സിംഗിനെ വീണ്ടും ഉത്തേജക മരുന്നു പരിശോധനക്ക് വിധേയനാക്കും. ഇതിലും പരാജയപ്പെട്ടാല്‍ താരത്തിനു റിയോയിലേക്കുള്ള ടിക്കറ്റ് നഷ്ടമാകും.
നേരത്തെ ഒളിംപിക് മെഡല്‍ ജേതാവ് സുശീല്‍ കുമാറിനു പരുക്കേറ്റതിനെ തുടര്‍ന്നു ട്രയല്‍സില്‍ പങ്കെടുക്കാന്‍ സാധിച്ചിരുന്നില്ല. ഇതോടെയാണ് സുശീല്‍ കുമാറിനു പകരം നര്‍സിങിനെ ഒളിംപിക്‌സ് സംഘത്തില്‍ ഉള്‍പ്പെടുത്തിയത്. അവകാശവാദവുമായി സുശീല്‍ രംഗത്തെത്തിയത് വിവാദമായിരുന്നു. പിന്നീട് കോടതി നര്‍സിങിനാണ് യോഗ്യതയെന്നു വിധിക്കുകയായിരുന്നു. ഉത്തേജക പരിശോധനാ ഫലം എതിരായതോടെ നര്‍സിങ് പുറത്താകലിന്റെ വക്കിലാണ്. അങ്ങനെ വന്നാല്‍ സുശീല്‍ കുമാറിനു വീണ്ടും നറുക്കു വീഴും.

ഗൂഢാലോചനയെന്നു പരിശീലകന്‍

ന്യൂഡല്‍ഹി: നര്‍സിങ് യാദവ് ഉത്തേജക പരിശോധനയില്‍ പരാജയപ്പെട്ടതായുള്ള വാര്‍ത്തകള്‍ ഞെട്ടിക്കുന്നതാണെന്നു യാദവിന്റെ പരിശീലകന്‍ ജഗ്മല്‍ സിങ്.
ഗുസ്തി താരങ്ങളുടെ അവസരം നഷ്ടപ്പെടുത്തുക ലക്ഷ്യമിട്ടു നടത്തിയ ഗൂഢാലോചനായാണ് ഇതിനു പിന്നിലെന്നും അദ്ദേഹം ആരോപിച്ചു.