തേഞ്ഞിപ്പലം: സമസ്തയുടെ ഇംഗ്ലീഷ് മീഡിയം സ്‌കൂളുകളുടെ പ്രവര്‍ത്തനം ഏകീകരിക്കുന്നതിന്റെ ഭാഗമായി രൂപീകരിച്ച അസോസിയേഷന്‍ ഓഫ് സമസ്ത മൈനോറിറ്റി ഇന്‍സ്റ്റിറ്റിയൂഷന്‍സിന്റെ (അസ്മി) തുടര്‍പ്രവര്‍ത്തനങ്ങള്‍ ഊര്‍ജിതമാക്കാന്‍ ഇന്നലെ ചേര്‍ന്ന ഭാരവാഹികളുടെ യോഗം തീരുമാനിച്ചു. തുടര്‍പ്രവര്‍ത്തങ്ങളുടെ ഭാഗമായി അഫ്‌ലിയേഷന്‍ നടപടികള്‍ മെയ് 16-നകം പൂര്‍ത്തീകരിക്കും.
പ്രീ പ്രൈമറി ക്ലാസിലെ പരിഷ്‌കരിച്ച പാഠപുസ്തകങ്ങളെ അടിസ്ഥാനമാക്കിയുള്ള ടീച്ചേഴ്‌സ് ട്രെയിനിങ് മെയ് 18,19 തിയതികളില്‍ വെളിമുക്ക് ക്രസന്റ് ബോര്‍ഡിങ് മദ്‌റസയില്‍ വച്ച് നടത്തും.
അസ്മിയുടെ സംസ്ഥാന ഓഫിസ് ഉദ്ഘാടനം മെയ് 15-ന് രാവിലെ 9.30-ന് പ്രസിഡന്റ് പാണക്കാട് സയ്യിദ് അബ്ബാസലി ശിഹാബ് തങ്ങളുടെ അദ്ധ്യക്ഷതയില്‍ സമസ്ത പ്രസിഡന്റ് സയ്യിദ് ജിഫ്‌രി മുത്തുക്കോയ തങ്ങള്‍ നിര്‍വഹിക്കും.
ബ്രോഷര്‍ പ്രകാശനം പ്രൊഫ. ആലിക്കുട്ടി മുസ്‌ലിയാരും ഗഏ ക്ലാസിലേക്കുള്ള പാഠപുസ്തകങ്ങളുടെ പ്രകാശനം എം.ടി അബ്ദുല്ല മുസ്‌ലിയാരും നിര്‍വഹിക്കും.
യോഗത്തില്‍ പി.വി മുഹമ്മദ് മൗലവി അദ്ധ്യക്ഷനായി. കെ മോയിന്‍ കുട്ടി മാസ്റ്റര്‍ ഉദ്ഘാടനം ചെയ്തു. ജനറല്‍ സെക്രട്ടറി ഹാജി പി.കെ മുഹമ്മദ്, കെ.കെ.എസ് തങ്ങള്‍ വെട്ടിച്ചിറ, അബ്ദുസ്സലാം ഫൈസി ഒളവട്ടൂര്‍, അബ്ദു റഹീം ചുഴലി, അഡ്വ. പി.പി ആരിഫ്, ഒ.കെ.എം കുട്ടി ഉമരി, നവാസ് ദാരിമി, മജീദ് പറവണ്ണ പങ്കെടുത്തു.