അമ്പലപ്പുഴ: ആലപ്പുഴ മെഡിക്കല്‍ കോളജ് ആശുപത്രിയില്‍ സ്വകാര്യലാബുകളുടെ ഏജന്റുമാര്‍ വിലസുന്നു. ഡോക്ടര്‍മാര്‍ക്കു വന്‍തുക നല്‍കി രോഗികളെ ലാബുകളിലേയ്ക്കു പറഞ്ഞുവിടുന്നതായും ആക്ഷേപം. ആശുപത്രിക്ക് സമീപം പ്രവര്‍ത്തിക്കുന്ന സ്വകാര്യ ലാബുകളുടെ ഏജന്റുമാരാണ് ആശുപത്രിക്കുള്ളില്‍ രാപകലില്ലാതെ പ്രവര്‍ത്തിക്കുന്നത്.

വിവിധ വിഭാഗങ്ങളിലെ ഡോക്ടര്‍മാര്‍ക്ക് വന്‍തുകയാണ് ലാബുടമകള്‍ കമ്മീഷനായി നല്‍കുന്നതെന്ന് പറയപ്പെടുന്നു. ലാബുടമകളും  ഡോക്ടര്‍മാരും ചേര്‍ന്ന് അനാവശ്യ പരിശോധനകള്‍ രോഗികളുടെമേല്‍ അടിച്ചേല്‍പ്പിക്കുന്നതായും സംശയിക്കുന്നു.

കഴിഞ്ഞ ദിവസം കാലില്‍ ചൊറിച്ചിലുമായെത്തിയ ഒരു രോഗിയെ ഡോക്ടര്‍  അടുത്തുള്ള സ്വകാര്യലാബിലേക്കു സ്‌കാനിങ് പരിശോധനയ്ക്ക് അയച്ചത് വിവാദമായിരിക്കുകയാണ്.

 മതിയായ യോഗ്യത ഇല്ലാത്ത ലാബുകളും പ്രവര്‍ത്തിക്കുന്നതായും പറയപ്പെടുന്നു.  ആശുപത്രിക്കുള്ളില്‍ ലാബിന്റെ ഏജന്റുമാര്‍ ഡോക്ടര്‍മാരെ സ്വാധീനിച്ച് രോഗികളെ പിഴിയുമ്പോഴും അധികൃതര്‍ ഇത് കണ്ടില്ലെന്ന് നടിക്കുകയാണ്.  ഇത്തരം പ്രവര്‍ത്തനം അവസാനിപ്പിക്കാന്‍ വിജിലന്‍സ് അന്വേഷണം വേണമെന്ന ആവശ്യമുയര്‍ന്നിട്ടുണ്ട്.