കൊല്‍ക്കത്ത: പോര്‍ച്ചുഗല്‍ നായകനും റയല്‍ മാഡ്രിഡ് സൂപ്പര്‍ താരവുമായ ക്രിസ്റ്റ്യാനോ റൊണാള്‍ഡോ ഇന്ത്യയില്‍ അരങ്ങേറുന്ന ഫിഫ അണ്ടര്‍ 17 ലോകകപ്പിന്റെ ഭാഗമാകുമെന്ന് പ്രതീക്ഷ. സൂപ്പര്‍ താരത്തെ ആദ്യമായി ഇന്ത്യന്‍ മണ്ണിലെത്തിക്കാന്‍ തീവ്ര ശ്രമം നടത്തുന്നതായി അഖിലേന്ത്യ ഫുട്‌ബോള്‍ ഫെഡറേഷന്‍ പ്രസിഡന്റ് പ്രഫുല്‍ പട്ടേല്‍ സ്ഥിരീകരിച്ചിട്ടുണ്ട്. ജൂലൈയില്‍ നടക്കുന്ന മത്സര ക്രമങ്ങളുടെ നറുക്കെടുപ്പില്‍ താരത്തെ പങ്കെടുപ്പിക്കാനുള്ള ചര്‍ച്ചകള്‍ നടക്കുന്നതായി അദ്ദേഹം വ്യക്തമാക്കി. 

ജൂലൈ ഏഴിന് മുംബൈയിലാണ് നറുക്കെടുപ്പ് നടക്കുന്നത്. ഒക്ടോബര്‍ ആറ് മുതല്‍ 28 വരെ കേരളത്തിലെ കൊച്ചിയടക്കമുള്ള ആറ് വേദികളിലായാണ് ഇന്ത്യയിലെ ആദ്യ ഫിഫ ലോക മാമാങ്കം അരങ്ങേറുന്നത്. താരം വരുന്ന കാര്യം ഉറപ്പായിട്ടില്ലെന്നും അതിനുള്ള ശ്രമം നടത്തുന്നതായും അദ്ദേഹം വ്യക്തമാക്കി.
ബാഴ്‌സലോണ ഇതിഹാസവും ലോകകപ്പ് നേടിയ സ്പാനിഷ് ടീമിന്റെ പ്രതിരോധ താരവുമായിരുന്ന കാര്‍ലോസ് പുയോള്‍ ഇന്ത്യയില്‍ അടുത്ത ആഴ്ച എത്തുമെന്ന് ഉറപ്പായിട്ടുണ്ട്. ഈ മാസം 15, 16 തിയതികളില്‍ നടക്കുന്ന ടൂര്‍ണമെന്റിന്റെ ടിക്കറ്റ് വില്‍പ്പയുമായി ബന്ധപ്പെട്ട ചടങ്ങില്‍ പുയോള്‍ സംബന്ധിക്കും.
അടുത്തിടെ സമൂഹ മാധ്യമങ്ങളിലൂടെ തന്റെ ഇന്ത്യാ പര്യടനത്തെക്കുറിച്ച് താരം വാചാലനായിരുന്നു. ഇതാണ് ഇന്ത്യയിലെ ക്രിസ്റ്റ്യാനോ പ്രേമികള്‍ക്ക് പ്രതീക്ഷ നല്‍കുന്നത്.